Simar ta protesta riba carta di minister Lampe cu a laga nan ‘babuca’

ORANJESTAD – Tumando nota di un carta di minister di Enseñansa Rudy Lampe na esnan den enseñansa, anunciando cierto corte den nan salario e.o, sindicato di maestro SIMAR a reacciona diadomingo atardi cu un carta pa prome minister Evelyn Wever.

KEHO

Segun presidente di e sindicato Josefine Albertus, e carta ta uno “cu e contenido, a laga un y tur babuca y a wordo traha sin consulta esunnan afecta” Albertus ta bisa. E ta sigui bisa cu e ta un carta cu decision unilateral di minister cu ‘atrobe ta causante di inkietud den enseñansa’.Segun Albertus, esaki despues cu un carta cu ta sali pidi maestronan yudansa, pa uza entre otro nan material y ekipo personal, pa asina brinda enseñansa den un forma alternativo, den e crisis actual. SIMAR a manda un carta pa premier Wever, expresando nan preocupacion. 

CARTA

Den e carta di minister Lampe, ta referi e.o. na medida cu ta afecta e salario di e.o. di e maestronan directamente. Esaki ta contrario na loke a palabra cu prome minister Wever un tempo pasa. Minister Lampe ta uza e situacion di crisis di coronavirus, pa implementa e medidanan aki. E mandatario ta mustra cu ta trata medidanan cu mester a wordo implementa pero no a sosode. Y awor cu e situacion di crisis, esaki mester tuma lugar ‘per direct’. Esaki no a cay den bon tera den e mundo di enseñansa na Aruba y SIMAR no a warda pa siman habri pa manda e carta, pero a opta pa haci esaki den fin di siman mes. Lesa e carta di minister AKI. Y lesa e carta di SIMAR AKI.