Aruba a lanta preparando pa 'shelter in place'

ORANJESTAD – Manera por a spera, despues cu gobiero di Aruba a anuncia e ‘shelter-in-place’ diahuebs anochi, esta un toque de queda cu limitacion special, un grupo grandi di hende a aglomera for di diabierna mainta tempran na supercado(nan) pa yena garoshi, como si fuera ‘mundo ta caba’ diadomingo. E prome lugar cu noticiacla a bay, tabata Pricemart, unda cu e rij tabata largisimo, cubriendo practicamente henter e parkinglot. Den solo, hopi cu masker di cara y handschoen, hende tabata para cu garoshi den solo, wardando nan turno. Lo positivo, ta cu por lo menos tur cos a bay ordena, hendenan para cu distancia relativo for di otro, y hopi cu masker y handschoen, aunke ta wordo bisa cu no ta necesario. For di personal di Pricemart, e portal aki a compronde cu ta laga hende dos dos drenta, mayornan di edad tin preferencia, y ta laga nan drenta prome. Ademas, ora cu hende drenta, otro ta sali. Esey ta e regla.