Entrante di diadomingo awor no ta permiti ni residente drenta Aruba mas

ORANJESTAD – Entrante diadomingo, definitivamente ningun residente por drenta Aruba mas. Definitivamente, pasobra desde cu a impone un lockdown riba buelonan pa Aruba, a suavisa e regla pa complace peticion di localnan cu sea tabata pega den exterior y of no por a bin mas prome. Asina premier Evelyn Wever a anuncia durante e briefing riba coronavirus diahuebs anochi. 

ARUBIANO PEGA OF CU ‘KIER’

Noticiacla.com a compronde cu e problema ta cu ta depende tin biaha di e ‘kier’ di e persona di ki dia e kier bin bek. Esey ta pone cu cada bez cu un persona ‘nobo’ yega, tin cu warda 2 siman atrobe pa wak si e persona ta desaroya e simptomanan. Pero esey ta caba diadomingo pues, e ora si ningun hende no ta biaha mas pa Aruba. E ta un decision duro porta, pero segun prome minister Wever, e cantidad alarmante di caso cu ta positivo pa coronavirus, ta forza gobierno tuma cierto medida.