Renaissance Aruba cu donacion di fruta y berdura

ORANJESTAD – Despues cu e team ehecutivo di Renaissance Aruba Resort & Casino a tuma e decision dificil di cera su portanan pa publico y manda tur empleado cas pa nan por cuida y atende nan mes na e distancia social, a opta pa hasi un donacion di tur fruta y berdura na algun casnan di cuido y anciano.

DONACION DI FRUTA Y BERDURA 

Un decision sigur no facil pero teniendo na cuenta e seriedad di distancia social a opta pa sera porta di Renaissance Aruba. Di acuerdo cu Sr. Paul Gielen, Gerente General; “Eta sinti bon pa di un manera chikito por yuda e comunidad di Aruba. Ya cu nos no por sirbi nos huespednan, y mirando e cantidad di cuminda cu nos tabata tin, e mihor opcion tabata na haci donacion di esakinan”. Mas di 200 caha di fruta y berdura cosistiendo di wortel, batata, apel, melon y mucho mas a wordo reparti pa Cas Cuido y Alegria pa nos Grandinan, Stichting Thuiszorg Aruba y Ambiente Feliz. Fruta y berdura cu tabata destina pa e huespednan, awor lo sirbi pa crea cumindanan pa e grupo den nos comunidad actual di mas vunerabel.

“ Como hotel hunto nos a siña pa navega den lama bruto pero trahando den e mundo di hospitalidad y servicio nos ta keda cu e sentido di proposito y conexion, apesar cu tin distancia social. Nos ta spera cu e donacion por yena nos grandinan y esnan den necesidad cu nutrition, vitamina y un poco di alivio pa e temporada dificil nos dilanti” Gielen a finalisa bisando.