CAFt a duna conseho positivo pa Aruba desvia di ley di LAFt

DEN HAAG – E colegio di supervision financiero CAFt a duna conseho positivo na Conseho di Minister di Reino (RMR) pa Aruba desvia di e ley di LAFt (particularmente articulo 23) debi na e situacion cu a surgi na Aruba relaciona cu e crisis di coronavirus. Asina e presidente Raymond Gradus ta informa minister Hulandes  Raymond Knops den un carta fecha 24 di maart 2020. Pero manera por a spera, e conseho ‘positivo’ no ta bin sin su condicionnan, aunke nan no ta ‘hopi’. Cu e conseho aki, Aruba por premira un contesta positivo di parti di RMR diabierna durante e reunion di RMR unda cu e asunto aki lo keda trata. 

CONSEHO

Segun Gradus, el a ricibi e peticion di Knops di 21 di maart 2020, (3 dia prome) pa un conseho riba e tema. Gradus ta bisa si mesora cu e contrario na Corsou y St Maarten cu tambe a haci peticionan similar, e no a wak e peticion di Aruba, pero si e consehonan di e instancianan financiero riba e scenarionan plantea. Pero debi cu e scenarionan no ta substancia, of substancia suficiente, ta dificil pa analisa na ki norma specifico Aruba lo no por cumpli cu ne. “Loke si nos sa, ta cu Aruba no por cumpi cu e norma actual” Gradus ta sigui bisa, refiriendo na e surplus di 45 miyon florin. 

RAPORTA

Como condicion pa duna e conseho positivo na Knops, CAFt kier pa Aruba raporta mensualmente riba e desaroyo y caso di likides, y cu tin cu traha palabracionan concreto di con lo anda cu e fondonan di emergencia y tambe maneho di e crisis. Ademas Gradus ta pidi pa revisa y traha palabracion nobo di e protocol actual of traha uno nobo. Cu e condicionan ey, CAFt ta duna su conseho positivo na Knops pa Aruba aplica articulo 23 di e ley di LAFT. Por lesa e carta completo AKI.