Veterinario Croes: Si bo tin COVID-19, limita contacto cu bo mascota

Veterinario Croes: Si bo tin COVID-19, limita contacto cu bo mascota

Posted on 03/25/2020 5:17 pm AST | Updated on 03/25/2020 5:22 pm AST

ORANJESTAD – E manera cu COVID-19 ta plama ta resultado di transmision entre hende cu hende. Te cu e fecha di awe no tin ningun evidencia cu mascota ta plama e malesa. Asina veterinario Irene Croes a bisa. Segun Croes, berdad cu infeccion cu coronavirus (CoV) ta comun den hende y den bestia, pero tin hopi diferente tipo di corona virus y solamente algun tipo ta un “zoönose”, pues transmitible entre hende cu bestia. 

Scientificonan ta opina cu e corona virus cu ta causa COVID-19 (SARS-CoV-2) por ta number 7 di e famia di coronaviridae cu ta un zoönose door cu e tin hopi similaridad cu un coronavirus cu ta wordo haya den un di e especienan di raton di anochi (Rhinolophus spp.) pero no tin evidencia scientifico suficiente pa por identifica e origen di e corona virus nobo aki of pa splica e ruta original di transmision for di animal pa hende. 

Tin tipo di CoV cu ta afecta specificamente cacho so (Canine CoV) y tin cu ta afecta pushi so (Feline CoV); esakinan no por wordo transmiti pa hende.

Na Hong Kong, 3 cacho a wordo poni den cuarantena di cual 2 a test positivo pa cu e CoV nobo aki cu ta causa COVID-19. E prome a wordo poni den cuarantena ora su doño a wordo hospitalisa pa via di COVID-19. Den vuarantena a test e cacho y e tambe a test positivo pa e CoV nobo aki. Door di esaki autoridadnan a dicidi di tuma e medida cu tur cacho di personanan cu wordo diagnostica cu COVID-19 lo wordo poni den cuarantena pa test. Asina nan a quarantine 2 otro cacho di un otro pashent di COVID-19, di cual 1 so a test positivo. 

Niun cacho cu a test positivo a bira malo di e virus aki cu ta causa COVID-19 den hende. 

Segun informacion oficial di OIE (World Organization for Animal Health) ta trata di contacto hopi intimo di doño cu mascota cu lo por a transmiti e virus pa e nanishi di e cachonan, pero mas investigacion ta tumando luga riba esaki. 

Veterinario oficial Irene Croes: “Aki na Aruba cachonan tin diferente rol den nan famia. E relacion por ta uno intimo como “gezelschapshond” of uno menos intimo como “waakhond”. Tur regla basico di hygiena mester wordo considera ora di atende cu bo mascota. Si bo tin COVID-19 ta recomendabel pa bo limita contacto cu bo mascota of laga otro hende atende cu bo mascota pa bo. Si no tin otro hende pa atende cu ne, corda laba man frecuentemente prome y depues di atende cu ne y si por, bisti un mondkapje tambe, pero sigur: no sunchi e, no lag’e lembe bo cara ni boca ni nanishi y no dun’e resto di bo cuminda. Tur esaki pa evita contagio pa bo cacho.”

E prome cacho di Hong Kong cual tawata un Pomeranian di 17 aña, a wordo entrega bek na su famia den bon salud despues di a test 2 biaha negativo. Berdad e la fayece despues di algun dia, pero considerando su edad y cu aparentemente su doño stima a fayece di e COVID-19, ta hopi mas probable cu e la fayece di algun condicion medico pre-existente of di tristesa, contrario di informacion inoficial cu tawata circula den rednan social cual tawata specula cu e lo a muri di COVID-19. 

Segun informacion di e departamento AFCD di Hong Kong (Agriculture, Fisheries and Conservation Department), e di 2 cacho cu a test positivo ta un Duitse Herder y esun cu a test negativo ta un mixed breed. 

“Na Aruba nos tin hopi cacho crioyo tambe, pues mixed breed, pues no tin ningun necesidad di deshaci di bo mascota den e panico pa cu e corona virus aki, pasobra esey ya caba ta un mal custumber cu hopi doño tin ora nan no kier nan mascota mas. Manera OIE ta bisa, no por hustifica pa tuma medida contra ningun mascota cu por compromete nan bienestar. Stima bo mascota. Den e tempo dificil aki di social distancing, e amor incondicional cu bo ta ricibi a cambio ta hopi bon bini. Si bo no tin un mascota y bo ta un doño responsabel, nos shelternan ta yen di candidato cu bo lo por adopta pa brinda bo e amor ey”, segun Irene Croes.

  • Pronk: Por cera negoshi cu no cumpli cu p.e. regla pa social distancing

    Pronk: Por cera negoshi cu no cumpli cu p.e. regla pa social distancing

    ORANJESTAD – E negoshinan cu no ta cumpli cu e reglanan stipula durante e periodo di crisis di coronavirus, lo por haya multa. Asina fiscal Yolanda Pronk a bisa durante e briefing di coronavirus diasabra anochi. A nota cu tin lugarnan cu por ta habri, y ta considera como esencial, pero no ta cumpli cu nan reglanan. Como tal e lugarnan aki por haya nan mes cu multa pa esaki. Lo por te hasta cera e negoshi temporalmente te ora cu e asuntonan cu no ta corecto, keda regla. Por pensa riba e.o. e medidanan introduci den e negoshi pa regla p.e. social distancing. A nota cu hopi hende no ta cumpliendo cu social distancing y tampoco e negoshi. Como tal, segun Pronk, a opta pa adapta e ley na vigor diasabra marduga pa por atende e negoshinan cu e aspecto aki tambe. 

  • A cera 17 negoshi cu a viola regla di 'Shelter in Place'

    A cera 17 negoshi cu a viola regla di 'Shelter in Place'

    ORANJESTAD – Durante un control diasabra na 33 establecimento, 17 di nan a wordo cera temporalmente. Esaki den cuadro di e crisis di coronavirus. Asina prome minister di Aruba Evelyn Wever Croes a confirma diasabra anochi durante e briefing diario riba e crisis. E task force cu ta consisti di polis y personal di departamento di salud, ta vigila e negoshinan.  Ta trata di negoshinan cu sea no tabata esencial pero a opta pa habri toch, of negoshinan esencial pero cu no a cumpli cu p.e. social distancing. A compronde cu 5 negoshi a haya multa tambe aunke no a specifica cuanto e multa tabata. 

  • Servicio di AZV ta sigui via telefon of email so

    Servicio di AZV ta sigui via telefon of email so

    (ADVERTORIAL)

  • Casonan positivo di coronavirus a subi te na 64

    Casonan positivo di coronavirus a subi te na 64

    ORANJESTAD - E cantidad di casonan positivo di coronavirus diasabra a aumenta cu dos pa bira un total di 64 caso confirma. Mas detayes ta keda duna despues. Mes momento DVG a desmenti e rumor cu a plama di un brote pisa di e virus na Savaneta. Enberdad tin un caso eynan pero no manera ta wordo papia di cu 5 cas y 40 persona lo ta contagia.

  • Cantidad di pashent hospitalisa cu coronavirus na Aruba a bira 9

    Cantidad di pashent hospitalisa cu coronavirus na Aruba a bira 9

    ORANJESTAD – Segun un documento cu lo a lek for di Hospital Horacio Oduber di e Outbreak Management Team, tin un total di 9 persona cu tin coronavirus, cu ta hospitalisa. Anteriormente tabata papia di un total di 6. Pa loke ta e 9 personanan, tres a keda getest pa hospital, 5 pa DVG, y 1 pa Respaldo. Di e 9 casonan, 2 ta den ICU/CCU.  Mes momento a mustra cu 2 pashent cu tabata hospitalisa, a bandona hospital mientrastanto. 

  • Colegio Arubano ta duna enseƱansa a distancia

    Colegio Arubano ta duna enseƱansa a distancia

    ORANJESTAD - Pa motibo di e Coronacrisis scol ta cera pa dos siman caba. Sinembargo, esaki no ta nifica cu no ta duna enseñansa. Colegio Arubano a saca probecho di e crisis, pa dal un paso grandi den digitalisacion di les, prueba y examen di scol: enseñansa a distancia.

  • Powered by SETAR