Parlamento a trata y aproba presupuesto 2020 den un solo dia

ORANJESTAD – Parlamento di Aruba den forma unanime (fraccionan di MEP, POR, RED y Daphne Lejuez) a aproba e presupuesto di crisis pa aña 2020 pa gobierno por subi mercado internacional pa busca fondo pa yuda esnan cu ta mas afecta pa e crisis di coronavirus. E tabata un momento historico ora cu 1. a aproba presupuesto den un solo dia, 2. Den un sala ‘bashi’, y 3. e suma gigantesto di un deficit. Fraccion di AVP a abstene di vota. Awor cu a haya aprobacion, lo cana e caminda normal di pidi aprobacion di e.o. conseho di minister di Reino. Lo baha gasto tambe di gobierno y adapta esaki na e realidad nobo cu pais Aruba ta bay haya su mes aden. 

PAKETE DI ALIVIO TEMPORAL

E alivio ta poni pa cubri tres tereno, segun premier Evelyn Wever a bisa despues di e votacion. Un di e terenonan ta esun di desempleadonan a consecuencia di e crisis. Den e grupo aki tin 214 miyon florin cu lo wordo inverti. E di dos ta negoshinan chikito y mediano di menos di 50 trahado, cu ta inverti 40 miyon florin. E di tres grupo (area) ta e area di SVB y AZV cu ta 429 miyon, cu ta loke gobierno a calcula cu e departamentonan aki lo haya menos, y sigura cu e fondonan aki ta keda funciona. Na tur ta papia di 683 miyon florin. Ademas tin un suma cu reforma fiscal mester a trece aden di 103 miyon florin. Pero como cu a cancela esaki, mester busca e fondo di otro caminda. Tambe tin cu presta placa cu economia lo no genera y tambe e falta di cumplimento di impuesto manera ta stipula, ta tene cuenta 250 miyon florin menos. Tur esaki ta pone cu si conta esaki hunto, Aruba tin un necesidad financiero di 1.3 biyon florin.