RIVM: Crecemento di contagio a baha na Hulanda pero ICU ta alarma

AMSTERDAM - E medidanan cu gobierno Hulandes a tuma pa controla e brote di coronavirus miho, a percura cu e crecemento di e brote a baha. Asina Jaap van Dissel, director di Centrum voor Infectieziektenbestrijding (CIB) di RIVM a bisa durante un briefing pa Tweede Kamer. “Por lo menos por papia di un trend positivo”. E grado di contagion di e coronavirus na Hulanda, pues e cantidad di persona cu un persona contagia por contagia, ta bou of na uno (compara cu 3). Por lesa su presentacion  online tambe.

Esaki por tin un influencia positivo riba termino largo, pero pa e expectative recien di e cantidad di pashentnan gravemente malo, esaki no tin efecto. Aworaki tin 600 pashent den hospital den Cuido Intensivo. Otro siman esaki por ta 1600 di cual 1100 ta pashentnan di coronavirus. Ta trahando duro door di hospitalnan pa haya mas cama y aparato cu ta adecua pa pashentan di coronavirus. Ta kere cu e peak di IC lo ta na fin di mei. Esey ta bon noticia den sentido cu tin tempo pa por prepara pa combati esaki pa e tempo ey. Tin hospital sinembargo cu no ta compronde con serio e situacion ta.