Aeropuerto di Aruba a cuminsa parce un ‘ghost airport’ caba

ORANJESTAD – Aeropuerto Reina Beatrix riba un diamars normal entre 11-3 pm ta repleto di movecion, sigur e parti di yegada rond di 1pm pa 3pm. Taxi, hende yegando, hende saliendo. Diamars merdia pa 2’or dia 24 di maart 2020, aeropuerto di Aruba parti pafo, tabata manera un ghost airport. A conferi cu vocero di Aeropuerto Hendrik Croes cu e situacion di e potretnan di noticiacla.com, enberdad no ta uno ‘normal’ pa mira. Cu excepcion di un taxista, e auto di takel y un auto di aeropuerto, no tabatin ningun alma presente. Y esaki cu ainda falta turista pa bandona Aruba. Esaki ta nifica cu pa e fin di siman aki, ora cu e grupo di 100 pico turista bandona Aruba, e situacion lo ta pio. Ainda tin buelonan yegando pa sea busca turista of trece Arubianonan. For di Colombia tin buelonan cu lo ta yegando diaranson y diahuebs, y tambe for di Merca. Pero pa diasabra y diadomingo, ta spera cu tur cos ta cla, esta cu no tin trafico mas. Un situacion cu lo tin cu perdura por lo menos te dia 31 di maart 2020. Diasabra un biaha mas lo haci un recorido pa wak kico e situacion ta e momento ey.