Dos partido di coalicion ta debati contra otro riba mocion

ORANJESTAD – Manera cu e tratamento di presupuesto 2020 a cuminsa diamars mainta, a inicia tambe un debate entre partidonan di coalicion riba un mocion cu a keda presenta. Mientras cu gobierno ta pidiendo 1.3 biyon florin na ayudo, fraccion di POR cu sosten di parlamentario independiente Daphne Lejuez, a entrega un mocion pa tur parlamentario y minister entrega 1000 florin di nan salario pa tres luna largo den forma solidario. Fraccion di MEP a bula bek, y ataca esaki pero no a bisa cuanto nan lo kier duna. 

E MOCION

E mocion entrega pa parlamentario Alan Howell (POR) ta bisa cu pa lunanan di april, mei y juni, tur parlamentario y minister ta bay haci un contribucion cu mil florin cu tin cu bay den e fondo di ayudo pa nos hendenan cu a perde entrada. 

REACCION

Miembronan di MEP (Partido di coalicion) mesora a protesta, unda cu a yama e oferta ‘algo populista’, of aros con pollo cu un pipita di aros’ entre otro. Esun cu a yama e oferta uno populista, no ta bisa cuanto si mester duna, y a bisa solamente cu MEP lo no sostene e mocion. Un otro parlamentario a ofrece pa paga su vacantie uitkering completo cu ta 8000 florin. Un otro a bisa cu kier duna mas cu mil florin. Pero niun di tres a bin cu algo mas concreto. No a tende ainda formalmente di fraccion di AVP y RED riba e mocion aki. A calcula cu si e mocion keda aproba, y sali for di punto di salida cu tur 21 parlamentario participa, esaki ta genera 63 mil florin hunto, y si añadi e ministernan (incluyendo plenipotenciario) e suma total lo ta 93.000 mil florin. Pues ni 100 mil florin, di un total di 1.3 biyon florin.