Gobierno a pidi Parlamento aprobacion pa fia 1.3 biyon florin

ORANJESTAD – Parlamento di Aruba a cuminsa tratamento di presupuesto di pais Aruba pa 2020 diamars mainta. Un presupuesto cu a bay di un surplus di 45 miyon pa un deficit di 1.3 biyon florin. Gobierno ta pidiendo Parlamento aprobacion pa por inverti e suma gigantesco aki pa ‘rescata e pais’ unabez cu sali di e crisis di coronavirus. Asina premier Evelyn Wever Croes a bisa dialuna anochi. Mientrastanto e tratamento a cuminsa, unda cu partidonan a haya 3 dia pa trata esaki. 

OPOSICION

A compronde cu fraccion di un partido Lejuez lo bay di acuerdo manera el a informa e portal aki siman pasa, y partido AVP tambe aunke cu nan kier sa di gobierno pakico si ainda Raad van Advies ta bay duna su conseho riba e nota di cambio cu a keda presenta den parlamento pa e suma biyonario. 

PLAN DI CONTINGENCIA

Segun gobierno, a evalua e magnitude di e crisis y e impacto cu e tin riba Aruba. A evalua esaki cu propio institutonan manera Banco Central, departamento Economico y Finanzas, y tambe hunto cu e agencianan internacional manera S&P y World Bank. A identifica di tur esey cu mester e suma di 1.3 biyon cu tin cu wanta te December di e aña aki, pa por pone Aruba bek riba pia. 

CON TA LOGRA ESAKI

Wever a sigura cu gobierno lo haci e sacrificio necesario den bahamento di su gastonan, aunke no a specifica unda lo baha gasto. E resto lo ta pa presta riba mercado internacional cu ayudo di Hulanda na un interes mas abou. E suma ta grandi, y e pakete mester brinda alivio na e trahadonan cu a perde trabou y of entrada. Ta brinda tambe na doñonan di trabou, un alivio pa asina nan por sigui opera of cuminsa opera bek ora cu e crisis ta tras di lomba. Ta papiando di empresanan chikito y mediano y empresarionan independiente y esnan mas grandi. A pidi e companianan grandi pa mantene trahadonan na pia di trabou. A sigura cu lo fortifica e fondonan social, manera SVB y AZV pasobra ta di e fondonan ey lo paga e pensioen di biehez y cubri gasto di salud di henter e comunidad. Si no inverti den nan segun Wever, nan lo core peliger. Como tal a inclui e suma ey den e plan di contingencia.