AHATA: Entrante diaranson lo tin apenas 110 turista hospedando na Aruba

ORANJESTAD – Entrante diaranson, Aruba lo conta cu un total di apenas 110 turista reparti den algun hotel. Asina AHATA ta raporta diamars riba su pagina di facebook. Ta bisa ‘apenas’, pasobra pa un fecha asina normalmente, Aruba lo tin 15.000 turista hospedando na Aruba, reparti den varios hotel. Cu esaki, ta ilustra e seriedad di e situacion cu hotelnan ta aden aworaki segun AHATA. Noticiacla.com a compronde tambe cu esaki ta nifica cu varios hotel lo sigui cera porta, y pa fin di siman aki, practicamente tur hotel lo cera nan porta temporalmente, te ora cu e situacion drecha. No ta conoci ki dia esaki ta.