Gobierno reglando charters pa trece Arubianonan pega na Colombia

ORANJESTAD – E cantidad di persona Arubiano cu ta pega den exterior awor a bira 227 for di 210 cu a keda anuncia un dia anterior segun CEO di Aruba Tourism Authority Ronella Tjin-Asjoe. Colombia ta keda ta e pais principal unda cu mayoria di Arubiano ta pega. Mientrastanto pa esnan di Merca, tin diferente persona si cu a logra usa buelonan pa bolbe Aruba. 

COLOMBIA 

TjinAsjoe a anuncia cu tin tres buelo charter cu Aruba Airlines den planificacion aworaki. A anuncia esaki dialuna anochi pasobra diamars ta e ultimo oportunidad cu tin pa move domesticamente den Colombia pa asina por yega na e tres ciudadnan di unda Aruba lo ta sacando e buelonan respectivo. E ciudadnan aki ta Medellin, Bogota y Baranquilla. Intencion ta pa diaranson mainta 11’or saca un buelo di Medellin, diaranson tambe cuarto pasa di 4 di atardi saca uno di Baranquilla y 26 di maart saca un buelo 11’or y 15 for di Bogota. Tin diferente persona na otro ciudadnan Colombiano cu mester yega e destinacionan menciona. Esnan cu mester biaha y mester di asistencia di embahada, ta paspoort,of cedula. Ademas lo por haya un carta personalisa di embahada cu por mustra autoridad y hustifica mobilisacion internamente. Esey ta importante pa tin, mirando e limitacion pa move na Colombia.