Gobierno a aumenta medidanan relaciona cu coronavirus

ORANJESTAD – Gobierno di Aruba a anuncia medidanan nobo, relaciona cu e crisis di coronavirus. Esaki ta necesario mirando cu e cantidad di caso positivo ta sigui aumenta. E prome anuncio ta cu ta cera tur bar y restaurant na Aruba entrante diamars 24 di maart 2020. E restaurant por ta habri  for di momento cu e toque de queda pasa 6’or di mainta, pero solamente pa takeaway, delivery of drive thru den dia y mester cera 8’or di anochi. Otro anuncio haci, ta cu e orario di cierre di tur establecimento ta bira 8’or. Esaki ta nifica tambe e pomp di gasoline cu por a keda habri te 9’or, incluyendo tambe restaurant. Tur cos ta cera 8’or di anochi pa tur trahado haya e oportunidad pa yega nan cas prome cu toque de queda inicia 9’or. E uniconan cu tin excepcion ta botica na warda y emergencia di hospital.