Vanessa Kock lo bira Alto Comisario suplente

ORANJESTAD - Gobierno di Aruba a anuncia dialuna atardi cu a dicidi cu ta bay encarga actual Alto Comisario sr. Andrew Hoo cu un otro funcion y tarea den Gobierno. Ademas a comparti tambe cu lo encarga Comisario sra. Vanessa Kock como Alto Comisario suplente y un Comishon lo bay inicia un sollicitatie-procedure. Loke nan no ta bisa ta e motibo di e cambio repentino aki. E motibo ta un decision cu Hoo a tuma di manda un voice note pa NoticiaCla.com den cual Hoo ta bisa cu e ta duna su permiso pa ‘share’ e note aki cu demas miembronan di prensa, cu ta loke a sosode tambe. Atrobe, cu peticion y permiso di e persona cu a manda e voice note.

A resulta cu e acto aki di un miembro asina cardinal den e beleidsteam cu ta maneha e crisis, ta saca informacion cierto informacion interno pa prensa, a mustra di ta inaceptabel pa gobierno. Pa loke ta e decision tuma pa gobierno, Sr. Hoo a mustra comprencion pa e decision tuma.   Minister di Husticia, mr. Andin Bikker, den nomber di Gobierno a gradici sr. Hoo pa su terea desplega durante 2 aña di su encargo cu e funcion di Alto Comisario.