Tur cu a keda deteni durante toque de queda a haya multa

ORANJESTAD – Un total di 29 persona (di e total di 31) deteni durante e prome anochi di toque de queda, a haya un multa. Asina fiscal Yolanda Pronk a bisa durante conferencia di prensa diadomingo anochi riba e tema di coronavirus. Dos di e personanan aki a haya un boet extra door di cu nan a resisti contra nan detencion. A splica kico lo pasa cu e personanan aki ya cu nan no ta deteni mas. Tur a haya un multa impone. Tin cu paga e multa aki dentro di dos siman na ministerio publico. Mes momento ta informa cu e oficina ey lo ta cera mirando e situacion di coronavirus. Pero por paga e multa aki online y por haya tur e info riba e facebook page di ministerio publico. 

SI NO PAGA MULTA

Si no paga dentro di dos siman, nan ta haya un citacion pa nan presenta dilanti huez. Normalmente automaticamente e boet e ora ta aumenta pero no por bisa cuanto. Si huez yega na acuerdo cu fiscal y impone un multa mas halto y e dicidi cu e no ta paga e multa aki tampoco, e ora ta wordo manda KIA pa e dianan cu ta coresponde cu cada persona ta haya.