Tin mas di 200 Arubiano ainda pega den exterior

ORANJESTAD – Tin un total di 210 Arubiano den exterior aworaki cu no por yega cas. Esta ciudadanonan cu ta residencia na Aruba pero tabata den exterior pa varios motibo. Asina CEO di oficina di turismo di Aruba Ronella TjinAsjoe a bisa diadomingo anochi durante un conferencia di prensa. Ta haciendo esfuerso pa logra haya e personanan aki bek pa Aruba aunke cu cu a cera frontera pa tur persona incluyendo Arubiano. A haci un excepcion pa asina laga e residentenan drenta Aruba aunke cu a oficialmente cera porta pa nan for di diasabra 21 di maart 2020. 

UNDA NAN TA

E mayoria di e personanan aki ta na Colombia, ta trata di 110 persona pega na varios parti di e pais andino. Entre nan tin Bogota, Medellin y otro partinan di Colombia. E di dos parti di residentenan afo, ta mayoria na Merca y primordialmente na Miami. Tin tambe Hulanda y otro paisnan. 

TRAMITE PA TRECE NAN BEK

Ta haciendo e tramite pa trece e personanan aki Aruba bek, y ta encera e.o. pa wak ki buelo tin disponibel ainda. P.e. for di Merca cu ta bin for di Atlanta y Chicago. Esaki ta conta pa dialuna y diamars. A pidi pa haci areglo pa no keda pega. Pa Colombia tin un grupo hopi grandi, pero no tin buelo directo for di e pais ey. Pa e mercado aki ta haciendo tramite pa por logra diferente charter pa saca nan for di diferente ciudad. Ta imposibel pa sali for di tur ciudad. Como tal a bisa cu mester cuminsa pensa cu asina cu anuncia for di unda ta logra regla charter, cu mester pensa caba di con pa yega cierto di e aeropuertonan aki, pa asina por logra yega cas bek. 

HULANDA

For di Hulanda ainda tin buelonan te 28 di maart proximo, pues aki tambe mester haci tramite tambe pa ta riba e buelonan aki. E ekipo di ATA lo ta disponibel te 10’or diadomingo y dialuna mainta 8-10pm y tin e lista di diferente persona pega. Mester verifica si e personanan ta riba e lista ey, pero tin cu exigi diferente  otro documentacion y informacion. Esaki ta pasobra fuera di areglo personal y peticion, a dicidi cu lo brinda asistencia financiero tambe na esnan pega afo. Pa haci esey, mester compila tur informacion. Mester prueba carci di AZV pa establece e.o. residencia, lugar di hospedahe, pa wak si mester paga hotel, persoonsnummer, y si tabatin pasashi di buelo inicial di regreso pa Aruba. Ta spera di tin e lista cla pa asina por informa esnan cu ta pega, ki buelo por ofrece e e persona.