NoticiaCla.com ta clarifica riba tema di cobertura di coronavirus

Prome cu tur cos, di parti di noticiacla.com nos ta compronde e situacion cu a surgi den comunidad, pa cu cobertura di prensa di e coronavirus. Y manera tur cos, tin dos banda di cada medaya. Te awor, bo a tende solamente un banda, y a reacciona. Esey ta comprondibel. Mes momento, nos ta pidi bo pa duna nos di noticiacla.com un oportunidad pa splica nos banda di medaya. 

PROME FOUT

E prome fayo segun noticiacla.com, tabata ora cu gobierno a cambia e structura di haci pregunta, unda cu no tabata permiti prensa mas pa drenta e sala, pa evita ‘contacto’, uzando e practica di distanciamento social. A duna prensa e posibilidad di haci pregunta via whatsapp. A acepta e posibilidad aki, pero rapidamente a bira bisto cu gobierno no tabata maneha e asunto debidamente. Door cu prensa tabata manda su preguntanan independientemente, unda mester a warda riba un contesta, esunnan encarga di pasa e pregunta, no tabata revisa e preguntanan, cu e consecuencia cu varios (hopi) pregunta tabata lansa dobel of mas, reflehando cu prensa ta haci pregunta dobel (of mas), mientras ya a haya e contesta caba. Mas cu claro e forma independiente aki a pone prensa mustra kens, bobo, incapacita etc. For di eynan, prensa a cuminsa haya mal nomber cu hende ta ‘cansa cu pregunta estupido’ di prensa y cu ta keda ripiti pregunta etc. 

Tabata culpa y huzga prensa ‘en general’ sin averigua of sikiera puntra, dicon tanto pregunta mescos asina di e periodistanan. Noticiacla publicamente a reclama esaki, y a haya oido mesora e mesun anochi, pa cual nos a gradici gobierno tambe pa e ‘cambio’. A sugeri numeroso biaha pa haci manera ta haci na e otro paisnan, esta adapta e situacion den sala, conforme e ‘distanciamento social’. Pero esaki no a wordo honra y ta respeta decision di gobierno tambe. Pero na mesun momento ta hacie un reto enorme pa prensa. 

TOQUE DE QUEDA

Despues a bin e anuncio di gobierno pa cu e toque de queda, unda cu a anuncia den un forma sorprendente cu prensa ta ‘exclui’ di e grupo di excepcion cu por subi caya, ya cu ‘ken cu ta por ta prensa’. 

Pa NoticiaCla.com e argumento pa laga prensa afo, door cu ‘prensa no ta acredita’ y como tal no por sa ken ta prensa y lo haya yen di hende riba caya cu ta pretende di ta prensa, no a cay den bon tera. Gobierno y comunidad ta bon na altura di e lista di prensa cu ta frecuenta conferencia di gobierno varios biaha pa siman. Aki tambe noticiacla.com a reclama publicamente y noticiacla.com a manda sugerencia pa tanto minister di husticia y prome minister di Aruba. E sugerencia ey tabata pa prensa por subi riba caya entre 9-11pm (durante prome anochi di e toque de queda) pa cubri e situacion cu ta surgi (adelantando cu hende lo no scucha y cu polis lo a cuminsa actua), cual a resulta di ta e caso tambe. Minister Bikker a referi NoticiaCla.com pa prome minister, pero no a haya reaccion di prome minister. 

DERECHO DI PRENSA

Pa esunnan cu no ta altura, internacionalmente (incluyendo Hulanda), ta stipula cu prensa ta forma parti di e grupo di excepcion, ora di un toque de queda. Esaki pa por documenta e sucesonan durante e orario aki. E pensamento eroneo cu ‘no tin hende riba caya, pues kico ta bay filma’, no ta corecto y esey a keda prueba caba. Niun momento NoticiaCla.com su intencion tabata pa subi riba caya henter anochi y bay haci druk. Esey no ta nos maneho di hiba noticia. NoticiaCla.com t’ey pa informa cu echo y den un forma investigativo su noticianan, buscando semper e berdad y tur banda di medaya. NoticiaCla.com a compronde den cierto forma e negacion, cu e argumento di gobierno cu ‘tur hende mester keda cas, pa no plama e virus’ y p’esey a trata di yega na un areglo cu e instancianan cu si ta permiti pa ta riba caya, pa keda haya informacion di suceso cu ta relevante y importante pa informa pueblo.  Prensa semper a y ta cubri suceso, y esey mester sigui sosode. Specialmente awor, unda por mustra comunidad, con nan mes ta incumpliendo peticion di gobierno pa nan siguridad, unda prensa tin e funcion di ‘raporta suceso’, cual ta diferencia di polis su trabou di cuida, protega y actua. 

CARTA FIRMA

E grupo di prensa a bin hunto diasabra, y a dicidi di acerca prome minister di Aruba cu e puntonan discuti, manera presenta ariba. Mientrastanto, a bay di acuerdo pa (mirando con e cosnan tabata bay cu gobierno), stop di haci cierto cobertura via gobierno temporalmente, pero cada prensa lo sigui informa su siguidonan na nan manera. No tabata un acto di rebeldia of di mustra poder, manera algun hende ta pensa of vocifera. NoticiaCla.com ta y lo keda un medio di comunicacion responsabel y confiabel, cu sa kico e ta haci y con pa hacie responsablemente y profesionalmente. Y si e ta sinti cu e no ta comodo cu cierto areglo, lo a adapta su punto di bista y maneho tambe. 

REUNION CU MINISTER PRESIDENTE

Durante un encuentro cu prome minister diasabra anochi, algun representante di prensa a topa cu e mandatario pafo di bestuurskantoor. Tabatin un intercambio di palabra, y despues e partidonan a separa. Tin un video di e momento aki cu ta mustra en realidad kico a pasa. Ta di lamenta si cu a opta pa saca e carta firma y plam’e rond cu informacion no completo y a insinua cu a haci desordo pafo durante conferencia di prensa,  papiando bruto cu minister president, faltando su persona respet etc. NoticiaCla.com no tabata presente, y despues di a wak e video, ta opina diferente, pero ta respeta tur hende nan punto di bista.  Lamentablemente e informacion a wordo gespin di un forma negativo, dunando prensa (incluyendo noticiacla) mal nomber. NoticiaCla.com kier expresa cu e ta lamenta esaki masha y ningun momento ta comparti e version negativo cu a sali. 

CAMBIO

Mes momento, NoticiaCla.com a dicidi cu pendiente e decision di prome minister riba e asunto di toque de queda, noticiacla ta mantene su punto cu no ta retransmiti e conferencianan di prensa di gobierno, pero si ta uza informacion, y mescos ta conta pa esun di polis, unda lo uza potret ricibi y traha su propio relato cu informacion ricibi. Cu esey NoticiaCla.com ta kita su firma di e carta inicialmente ricibi, pendiente un carta nobo cu lo mester sali pronto y ta pidi su disculpa na su siguidonan pa e inconveniencia.