American y Southwest debi na lockdown ta stop tur buelo pa Aruba te mei

ORANJESTAD – Mientras cu otro aeroliñanan Mericano a informa Aruba y nan clientenan cu nan ta reanuda nan buelonan despues di e lockdown impone, dos aeroliña (American Airlines y Southwest) a informa cu nan sinembargo lo dura mas largo prome cu bolbe Aruba. Y cu esaki nan kier men cu nan lo cuminsa bula bek pa Aruba te prome siman di mei. American a prik e fecha di 6 di mei proximo, y Southwest a bisa di lo ‘evalua’ pa cuminsa bula 4 di mei proximo. E dos aeroliñanan hunto tin 200 buelo mensual pa Aruba for di Merca. American tin 137 y Southwest 63. E intencion di e portal aki ta pa mustra e impacto cu esaki ta nifica pa practicamente 6 siman, entrante diadomingo, cu e aeroliñanan aki  no ta bula mas pa Aruba por lo pronto . 

AEROLIÑANAN

Di e resto di e 7 aeroliñanan cu ta bula pa Aruba di Merca, Delta tabata e unico cu a pone fecha fiho, cu ta 1 di april, cu nan lo reanuda nan buelonan. Delta tin 73 buelo mensual pa Aruba. E otro aeroliñanan a bisa cu ta stop buelonan pa Aruba ‘te proximo aviso’. JetBlue cu tin 129 buelo pa luna pa Aruba, ta un di nan. 

EFECTO NEGATIVO

Cu esaki, ta mira cu mientras cu gobierno di Aruba tin ‘intencion’ di evalua y elimina e lockdown aki pa 31 di maart 2020 (ta papia di evalua prome), varios aeroliña no ta bay cumpli cu esey y lo dura mas largo prome cu nan reanuda nan buelonan. Fuentenan di nivel halto den ATA ta interpreta e asunto diferente y no ta mira esaki como algo necesariamente negativo, sino a te hasta indica cu aeroliñanan ta positivo pa ora cu nan reanuda nan buelonan. 

DANGUI ODUBER

E minister di turismo sinembargo ta wak e cu otro wowo y a bisa caba receintemente cu ‘e  impacto di e lockdown pa Aruba manera anuncia, lo ta “hopi tenso cu consecuencianan catastrofico pa nos turismo, economia, labor y finanzas publico. E mandatario ta referi na e cantidad di aeroliña cu lo stop di ‘trece’ turista pa nos isla. 

SLOW START

Mester compronde tambe cu mientras cu Aruba por ta habriendo caminda bek pa 1 april 2020 probablemente, esey no automaticamente kier men cu ya pa 2 di april, avionan yen di turista Mericano lo cuminsa yega nos isla atrobe y sigui loke a para pa mas di 6 siman pa motibo di e crisis. Esaki pasobra no ta conoci ki efecto e virus lo tin den e proximo 6 simanan, ni si Americanonan lo tin biahamento como prioridad, pa motibo di e situacion financiero cu e pais lo por ta aden proximamente.