Arends: Partido AVP kier sa mas di contenido di presupuesto nobo

ORANJESTAD – Fraccion di AVP lo mester analisa e presupuesto 2020 den su ‘bachi nobo’, osea cu e pakete di crisis manera cu e lo por keda presenta proximamente den Parlamento prome di aproba. Asina el a bisa noticiacla.com diabierna como reaccion riba peticion di premier Wever Croes na Parlamento pa uni pa por pasa e presupuesto mas liher cu ta posibel pa por bin na remarke pa fondo pa cubri e crisis di coronavirus na Aruba actualmente. 

OPINION

“Nos no a ricibi nada ainda na Parlamento y ta dificil pa duna un opinion na e momento aki” parlamentario Richard Arends (AVP) a bisa noticiacla.com diabierna. “Como fraccion nos a sostene e yamado na cumpli cu e responsabilidad civico. E ideanan cu nos a scucha pa duna asistencia na esnan cu a wordo afecta ta noble, pero nos lo kier sa mas di e contenido (p.e. con lo yega na fondo, maneho, criteria, responsabilisacion). Na momento cu nos tin e informacion aki siguramente nos lo por evalúa debidamente” Arends a sigui bisa. 

CARTE BLANCHE

Segun Arends, como Parlamentario nan ta conciente di e situacion sin presedente, pero nan no por duna un carte blanche sin mas. “Nos tin e obligacion pa e instituto Parlamento keda funciona, pa nos por duna nos input y cu nos por sigui eherce e checks and balances necesario” Arends a finalisa bisando.