Lejuez: Lo sostene presupuesto mirando urgencia pa haya prestamo pa crisis

ORANJESTAD- Parlamentario independiente Daphne Lejuez lo sostene e presupuesto 2020 di pais Aruba unabez cu e keda trata posiblemente otro siman. Asina e parlamentario a bisa noticiacla.com despues di a tende di e peticion di prome minister Evelyn Wever pa sosten di parlamento completo. Ta necesario segun Wever, pa pasa e presupuesto prome cu por haya fondo pa yuda Aruba den e crisis di coronavirus. 

DI ACUERDO

“Mi ta completamente diacuerdo cu nos Minister President cu awor, mas cu nunca, ta momento pa pone nos diferencianan politico un banda y para hunto pa pone Pueblo di Aruba na promer lugar” Lejuez a cuminsa na bisa, indicando cu esaki ta algo cu ‘eigenlijk mester considera semper y no solamente durante temporada di crisis’.

URGENCIA

“Mirando cu ta necesario pa aproba e presupuesto prome cu por ricibi prestamonan necesario pa por cumpli cu nos Pueblo den momentonan di crisis y necesidad, gobierno sigur lo por conta cu mi sosten” Lejuez a sigui bisa. Mirando cu lo elimina tur e medidanan di reforma fiscal 2 cu ta representa rond di 120 miyon florin y lo laga un buraco grandi den e presupuesto actual, e parlamentario ta spera cu no solamente lo elimina esaki y presenta un pakete di alivio, pero tambe lo presenta un plan structural di reduccion di gasto cu ta sumante necesario, y vooral solidario, si considera cu henter comunidad mester hala faha mara y adapta na e realidad y situacion cu nos ta enfrenta awe.

DISTANCIA SOCIAL

Lejuez a bisa tambe cu el a hasi un peticion na Presidente di Parlamento, mirando e necesidad di mantene distancia social pa por reduci e transmission di virus, pa considera reunion di Parlamento usando metodonan virtual manera por ehempel tele-conference na unda tur Parlamentario, ministernan y personal cu normalmente ta presente na reunionan di Parlamento por participa sin riesgo inecessario di contagio, den caso cu tin cualkier persona cu recientemente por tawata den exterior, ta cai den categoria di riesgo of ta biba cu esnan cu ta cai den e categoria aki.

SOSTENE INICIATIVA

“ Bisando esaki, mi kier reitera cu mi lo sostene cualkier iniciativa financieramente responsabel pa brinda sosten na nos comunidad y muy particularmente na esnan mas vulnerabel y esnan cu por a perde nan trabou, como tambe na esnan cu ta dunador di trabou, pa por sobrevivi e temponan di incertidumbre nos dilanti y cumpli cu nan obligacionan y pa por simplemente pone cuminda riba mesa” e parlamentario a finalisa bisando.