Aruba ta spera su di 1 miyon turista bishitante diaranson merdia

ORANJESTAD – Diaranson merdia oficina di turismo di Aruba ta spera e yegada di e di 1 miyon turista bishitante. Mientras cu no ta conoci kico e formula exacto ta pa scohe e persona aki, gobierno y Aruba Tourism Authority a programa un actividad di yegada pa ora di merdia, sperando e turista aki. No ta conoci tampoco cua nacionalidad e turista lo por tin, of si ta uno solamente di Merca ta wordo scohi. Hecho ta cu segun informacion cu ATA tin, e siman aki e cifra lo wordo yega. Nunca antes a logra e cifra aki, y como tal segun ATA ta motibo di celebracion. Den pasado tabatin e di 1 miyon bishitante, pero esey tabata un combinacion di yegada di turista crucero y biahero. E biaha aki ta trata netamente di un turista cu ta bin cu avion, y cu ta pasa anochi na Aruba.