Wever: Sin presupuesto aproba, no por haya fondo di emergencia

ORANJESTAD – Gobierno di Aruba a duna indicacion diabierna anochi cu Parlamento di Aruba lo cuminsa trata presupuesto 2020 otro siman. Mes momento a pidi partidonan di oposicion y independiente, pa sostene gobierno den e tempo di crisis aki. Mas lihe e presupuesto pasa, mas liher gobierno lo por haya fondo di emergencia pa trata e situacion di crisis di coronavirus. Esey tabata e apelacion durante e conferencia di prensa di gobierno riba coronavirus. 

HULANDA TA YUDA

Segun Wever, Hulanda a aproba un pakete di emergencia pa Aruba, Corsou y St Maarten y islanan BES .”Hunto cu Hulanda nos lo bay busca fondonan of fiansa pa nos por atende cu e diferente paketenan di emergencia y alivio cu cada pais ta preparando” Wever a bisa. Wever kier bay parlamento di aluna awor cu e pakete di alivio aki pa Aruba cu ta bay den e presupuesto 2020. 

APELACION

Wever a haci un apelacion na tur parlamentario, na tur politico y partido politico pa para hunto den esaki. “Esaki ta e momento cu nos mester demonstra na e pueblo di Aruba cu nos por uni den bienestar di esnan cu ta wordo mas seriamente afecta” Wever a bisa. “Mi peticion ta pa nos trata e presupuesto aki mas liher cu ta posibel, y pa nos aproba esaki pasobra ta cu e presupuesto aki nos ta bay busca e fiansa of e fondonan hunto cu Hulanda, of nos mes pasobra nos no por warda hopi, pa nos duna alivio na e trahadonan y empresanan cu ta wordo afecta” Wever a sigui bisa.