Aruba awor lo manda pashent Miami envez di Colombia

ORANJESTAD – Aruba lo por manda pashentnan Miami pa cuido medico adicional, envez di manda nan pa Colombia. Asina minister di Salud Dangui Oduber a bisa diabierna atardi durante un conferencia di prensa. A mustra cu debi na e situacion pa cu Coronavirus unda cu Colombia a cera su frontera, Aruba a haye obliga di busca alternativa.

FACILIDAD MIAMI

Aworaki tin dos facilidad medico na Miami cu ta dispuesto pa tuma e pashentnan di Aruba conforme cu nan no ta positivo pa coronavirus. Asina consul Mericano a informa gobierno di Aruba. Ta trata di pashentnan cu mester di ayudo urgente, cu tambe ta inclui muchanan cu tambe resulta di ta pashent critico, den departamento di pediatria. Claro, cu tur cos ta depende di gobierno Mericano si nan decisionan cambia pa loke nan proximo maneho di coronavirus. 

MERCA CERA FRONTERA?

Por bien ta cu presidente Mericano Donald Trump dicidi dentro di poco pa cera frontera di Merca pa resto di mundo, cu lo nifica complicacion pa Aruba. Pero asina mes Aruba ta den bon comunicacion cu consul Mericano cu a bisa cu si Merca cera frontera mes, nan ta dispuesto pa sigui hiba e discusionan aki y wak kico ta e opcionan cu nan por brinda nos si esey sosode na Merca. AZV lo sigui explora otro alternativa fuera di Merca.