‘YMCA San Nicolas ta cla pa 2015!’

SAN NICOLAS – Despues di un trayecto largo diamars dia 16 di december 2014 tabata e dia ideal pa inaugura e YMCA San Nicolas nobo y eficiente. Un proyecto cu a cuminsa algun aña atras na momento cu un team di experto di Valero a bishita e edificio pa asina wak unda YMCA San Nicolas tin mester di ayudo pa por funciona optimalmente den nos comunidad. A señala varios punto di preocupacion manera entre otro gastonan di coriente halto cu ta un peso grandi riba e centro su gastonan operacional, un dak riba e cancha di basketball bieu y den necesidad di un renobacion, un cura cu den varios lugar tabata kibra y tabata cay den otro como tambe algun trabou di mantencion riba e speeltuin y hekwerk.

Considerando entre otro e bon trabou di YMCA San Nicolas den nos comunidad y cu e centro ta situa den nos area di operacion Valero a dicidi pa tuma e proyecto aki bou di e capa di Aruba Way Foundation. Teniendo e magnitud di e proyecto na cuenta a cuminsa sondea e posibilidad pa otro companianan cu tambe tin un presencia economico Pariba di brug bira contribuidonan di e proyecto. Asina poco poco e proyecto a cuminsa cana y e team a cuminsa defini e trabounan necesario pa traha un budget. Cu entusiasmo partners manera Caribbean Mercantile Bank y Brock-Goedecke a join e proyecto imediatamente!

Pa reduci e gastonan di coriente halto e team a sugeri pa cambia tur airco pa e modelo inverter, e lusnan di pafor pa LED y si por pone solar panels. Aki nan ta unda Pfixx Aruba a join e proyecto y a haci un donacion di e panelnan solar na YMCA San Nicolas. Awor mester a traha un structura pa por pone e panels riba dje. Net e mesun tempo aki EPB San Nicolas a acerca Valero cu e pregunta si nos tin lugar pa algun di nan studiante tecnico haci nan pasantia. Hunto cu e contratista a bin na e acuerdo cu 5 studiante di EPB San Nicolas lo haci nan pasantia na YMCA San Nicolas yudando cu e construccion di e structura pa e panelnan solar. Hunto cu e proyecto di instalacion di panel solar y cambio di tur airco pa inverter y lusnan pa LED a cuminsa cu e trabounan pa pone un dak nobo pa e cancha di basketball. Tambe a drecha e tribuna y danki na CEDE Aruba na ultimo momento a drecha y verf e vloer di e cancha tambe.