Pa Aruba haya ayudo, mester pasa presupuesto prome

ORANJESTAD – Si Aruba kier haya asistencia di Hulanda pa e.o. fondonan financiero, Aruba mester pasa su presupuesto 2020 prome. Mientrastanto Hulanda a ofrece su disponibilidad pa yuda Aruba pa busca fondonan financiero atravez di Union Europeo y yuda nos busca fianza na interesnan faborabel riba tereno internacional. Asina Premier Evelyn Wever a bisa durante conferencia di prensa di gobierno diahuebs anochi. Cu e placa ey, Aruba tin cu cubri e gastonan cu nos isla tin, no solamente pa e virus mes, sino ta e asistencia na esnan cu mester di asistencia. 

PRESUPUESTO

Segun Wever, sin presupuesto aproba, Aruba no por presta placa riba mercado internacional. A anuncia tambe cu e presupuesto ta na Parlamento. “Sinembargo nos a tuma e decision cu henter e pakete di reforma fiscal ta wordo kita for di mesa” Wever a anuncia. Pues e reforma fiscal ey no ta sigui. Esey kier men cu e ideanan pa bin cu diviezen provisie, BBO bij invoer y IPC no ta sigui mas. “Esaki pasobra nos tin cu pone nos atencion riba crisis y con nos ta bay yuda tanto comercio como ciudadanonan den esaki” Wever a bisa. 

CORTA GASTO

Di otro banda, a bisa cu ta bay corta gasto si. Den tempo di crisis segun Wever, tur hende mester hala faha mara. “Ta bay tuma sacrificio di tur hende riba e pais akinan pa nos por pasa door di e crisis y pa nos por surpase” Wever a sigui bisa. Gobierno lo bay parlamento e dianan aki cu ta bira muy probablemente dialuna caba y den e presupuesto ta bay inclui un pakete di alivio.