AAA: Total di 24 trahado di aeropuerto ta den cuarentena

ORANJESTAD – Un total di 24 persona ta den cuarentena pa coronavirus. Asina e CEO di aeropuerto Joost Meijs a bisa diahuebs anochi durante conferencia di prensa riba coronavirus. Ademas a splica cu e di 5 persona cu a keda infecta cu coronavirus ta un hende homber cu ta traha den customer service na aeropuerto. Mientras cu no kier a divulga nomber di e persona ni e lugar unda cu e ta traha pa motibo di privacidad, a bisa si cu ta den e parti Mericano y cu ta un compania di groundhandling. E CEO a splica ki implicacion e asunto aki tin pa tanto e compania como e aeropuerto. 

E CASO

E persona cu a keda contagia cu e virus, tabata di vacantie na Merca y a bolbe Aruba dia 8 di maart ultimo. Ta dia 17 di maart 2020 cu e homber a haya simptoma visible di e virus pa cual el a wordo gescreened mesora y a wordo manda cas mesora. Tabata awe 19 di maart 2020 cu e resultado a bira conoci, cu tabata  positivo. Segun Meijs, mesora a tuma paso ora cu a bin tende di e informacion. A cuminsa cu e contact tracing pa haya tur hende cu tabata den contacto e ultimo 24 ora cu e homber. Basa riba esaki AAA mes a manda 3 hende cas mesora pa self cuarantena, pero cu tabatin simptoma. Banda di esey, su doño di trabou a manda 18 hende cas cu tabata den contacto directo cu e persona en cuestion. Y un di tres partner di aeropuerto a manda 3 hende cas, tur sin simptoma. E oficina di mes a wordo cera mesora pa asina trabou di limpiesa total tuma lugar. Y tur oficina ‘back of the house’ di e compania, ubica den e parti di US checking a wordo cera completamente awe. 

CON TA SIGUI

Segun Meijs, aeropuerto ta keda habri como infrastructura vital. E proximo dianan hopi pasahero lo bandona Aruba pa nan cas den exterior. Esaki lo sigui te posiblemente 24 di maart proximo. Despues aeropuerto lo keda habri pero como vigilante. Aeropuerto lo keda habri pa buelonan charter, cargo y tambe air ambulance. Entrante 24 di maart proximo, lo no tin pasahero mas na aeropuerto y ta bira 0.