AHATA: Cuminsando otro siman no tin turismo na Aruba

ORANJESTAD  - Cuminsando otro siman no tin turismo na Aruba. Asina  Aruba Hotel & Tourism Association (AHATA) a informa diahuebs atardi den un comunicado. AHATA a ofrece informacion tocante e realidad cu nos industria di turismo ta experienciando a consecuencia di e crisis mundial di Coronavirus COVID-19.

CERA FRONTERA

Segun AHATA, den esfuersonan importante pa frena e virus na Aruba, nos Gobierno mester a tuma e decision dificil pa cera nos frontera pa tur bishitante internacional te 31 di Maart. Aerolineanan cu ta experienciando retonan sin precedente a cambio nan schedule como reaccion na tur frontera cera y pa purba salvaguardia nan compania.

STOP DI BUELO

Buelonan di Merca lo stop di yega y sali di Aruba temporalmente riba 25 di Maart. Buelonan yegando ta trece residente local so y no bishitante pa motibo di nos frontera cera pa bishitante internacional. Buelonan cu ta sali ta hibando turistanan bek cas.

OCUPACION

Ta importante pa tur hende compronde cu ocupacion na hotel ta bahando lihe y pa otro siman ta premira cu e ta yega ocupacion 0. Sin bishitante no tin huesped y cliente pa nos industria di HORECA. Sin cliente, no tin entrada. Hotelnan lo mester suspende servicio y keda mantene e facilidnan minimalmente pa por habri bek mas lihe posibel.

FASE DI RECUPERACION

AHATA ta spera cu nos por drenta den fase di recuperacion pronto, danki na tur e decisionnan dificil cu mester tuma awor. “Nos mester yuda Aruba pa ta lo mas resiliente posibel pa surpasa e crisis mas lihe posibel. AHATA ta trahando estrechamente cu Gobierno y ta urgi tur compania pa tuma decisionnan responsabel y haci lo mas posibel pa apoya nos residentenan durante e crisis” e comunicado ta finalisa bisando. AHATA a urgi tur hende na Aruba pa sigui e instruccion di Departamento di Salud Publico, pasobra e lucha contra e transmision di e virus COVID-19 ta responsabilidad di nos tur. Nos tur mester yuda otro mas cu nunca.