David Kock: Corona: vakantie obligatorio/no work, no pay

(ADVERTORIAL)

ORANJESTAD - Kico nos sa di e virus COVID-19? Esaki ta bay dura pa largo? Kico tin ta spera nos? Kico ta permiti dentro di e margen di ley of kico ta posibel si dunadornan di trabou cuminsa minimalisa e cantidad di ora di trabou? Dunadornan di trabou ta obliga di wanta e situacion te na final? “No work, no pay” ta posibel? Of no ta keda otro cu kita empleado for di trabou?

Esaki ta solamente un paar di pregunta cu ta surgi en conexion cu coronavirus. E “lockdown di nos frontera”, e orario adapta di cera establecimento obligatorio, e consehonan pa cu “social distancing” tur tin consecuencia. Y e consecuencianan aki a cuminsa manifesta nan mes caba. A base di tur e consehonan duna door di gobierno, 4 casino a dicidi di cera nan porta. Expectativa ta cu algun hotel tambe lo sera nan portanan a corto plazo. Comprendibel, mirando cu kier evita mas contagio di e coronavirus, pues lo kier evita contacto humano mas hopi cu ta posibel. Pero sin e contacto, sin e bishitante, sin e turista y sin cliente kiermen tambe sin trabou pa eherce y sin entrada. Sin entrada, e dunador di trabou no lo por paga salario. Un spiraal negativo...

Den e memo aki, nos lo toca algun punto encuanto e aspecto laboral mara na e situacion cu a presenta su mes awo. Kico trahadornan mester permiti y kico dunadornan di trabou por haci den un situacion manera esaki?

Pa kita un trahador for di trabou, un dunador di trabou mester permiso di Departamento di Labor, un asina yama: “ontslagvergunning”. Pa haya esaki, ta tuma tempo. E pregunta ta si dunadornan di trabou mientras tanto lo mester keda paga salario, si tene na cuenta cu en realidad no tin trabou pa wordo eherce mientras tanto.

Un prome solucion cu dunadornan di trabou por pensa ta pa manda personal cu vakantie. A base di articulo 4 inciso 3 di Ordenanza di Vakantie, e decision encuanto e momento/periodo cu vakantie por wordo tuma ta keda na e dunador di trabou. Ni maske cu inciso 2 di e articulo aki ta stipula cu un trahador por pidi vakantie y cu preferiblemente e dunador di trabou hunto cu e trahador ta yega na un acuerdo encuanto e vakantie, inciso 3 toch ta duna e dunador di trabou e posibilidad pa manda e trahador cu vakantie obligatario (sin mester di consulta cu e trahador). E situacion actual cu nos ta encontra nos mes aden ta uno unico y e ta permiti e dunador di trabou pa manda su trahador cu vakantie. Mas cu claro, e trahador ta keda cu su derecho di keda ricibi su salario normal durante su vakantie.

Pero den caso cu e situacion ta haci cu e dunador di trabou no ta genera entrada, e dunador di trabou lo hay’e obliga di tuma otro medida. Un di esakinan por ta aplicacion di e regla di “no work, no pay”, prome cu tuma decision di kita un empleado for di trabou.

A base di articulo 1614b di nos Codigo Civil, e dunador di trabou no ta obliga pa paga salario pa e tempo cu trahador no a traha. Esaki ta e articulo cu ta describi “no work, no pay”. Segun e articulo aki, un dunador di trabou no ta obliga na sigui paga salario pa e periodo cu trabou no ta wordo eherce. Pero na mesun momento articulo 1614c di nos Codigo Civil ta stipula cu un trahador tin derecho riba su salario den caso cu e no tabata por a traha a base di un motibo cu ta bin pa risico di e dunador di trabou. Boso ta wak e ta bin caba ... e pregunta cardinal: ken ta carga e risico pa un pandemia, y den e cuadro aki, e pakete di medida cu a wordo implementa pa evita mas contagio di coronavirus?

Hurisprudencia no ta duna un contesta riba e ultimo pregunta aki. Probablemente pasobra un situacion manera esaki nunca a yega di presenta su mes. Literatura actual a brinda nos (1) ehempel/ situacion parecido. Como ehempel ta wordo treci dilanti; circumstancia di mal tempo, unda a base di mal tempo, e trahadornan no por a traha. Den e situacion di mal tempo, esaki ta bin pa risico di e dunador di trabou. Pero na mesun momento ta bisa tambe cu si e situacion di mal tempo dura largo e situacion por cambia, y cu aplicacion di “no work, no pay” ta bira hustificabel, ya cu e dunador di trabou no tin ningun influencia riba e tempo.