Polis ta sigui procesa rijbewijs otro aña atrobe

ORANJESTAD - Dos dia despues cu a habri e oportunidad pa hende registra atrobe pa rijbewijs, a bin e informacion cu entrante 17 di december, e departamento di Polis cu ta procesa rijbewijs situa na Santa Cruz lo ta cera pa publico. Nan ta haciendo inventario, pa por ta cla pa cumpli cu e demanda creciente cu tin pa renobacion of aplica pa un rijbewijs. Entrante dia 5 di januari 2015 nan lo ta habri atrobe, pa por sigui sirbi comunidad di Aruba. 

Tabata dialuna cu NoticiaCla.com a raporta cu tabatin rij nan largo na oficina di rijbewijs na Sta Cruz di hende cu mester a bin procesa nan rijbewijs. Despues di a para e proceso pa registra pa renobacion di rijbewijs algun siman atras, a habri esaki dialuna atrobe. Filanan largo dilanti e oficina a pone cu hendenan no tabata mucho contento pa esaki. Fuera di esaki, tabatin keho cu no tabatin suficiente informacion corecto di ki documento mester a trece pa por cumpli cu e proceso. Algun a bay docter pa busca un formulario pa declaracion y paga pa esaki, sin cu e tabata necesario. 

Den e matutino Bon Dia Aruba dialuna, e inspector di polis Ricardo Muller ta mustra cu enberdad no mester di declaracion di docter mas, segun stipulacion di ley nobo. Asina tin mas asunto cu no tabata mucho cla dialuna mainta pa esnan para den rij. Muller a sigui bisa den Bon Dia Aruba, cu tin casi 4000 rijbewijs temporario cu a keda procesa. “Kier men tin basta hende cu ta bin renoba nan rijbewijs pa dia y esnan cu ta pasa rijbewijs pa prome biaha” Muller ta bisa.

Ta conoci cu actualmente esnan cu pasa rijbewijs of haya extension/renobacion, ta haya uno temporal blanco, pero cu nan no por uza como identificacion oficial debi na e falta di cierto informacion riba e carnet di rijbewijs. Esaki ta pendiente e proceso nobo na 2015 cu lo cuminsa cu procesamento di rijbewijs na Aruba mes. Esey ta nifica tambe cu no mester warda pa Hulanda traha esaki den futuro, agilisando e proceso mucho mas. Pero pa a yega y keda cla, tin contratiempo cu gobierno ta atendiendo aworaki. Y esaki tabata e motibo cu a bin cu e rijbewijs temporal blanco, te ora cu keda cla. Unabes cu esaki ta resolvi, lo cuminsa duna e carnet ‘roos’ atrobe.