Trudy Hassell ta bira proximo director di KIA

ORANJESTAD – Actual comisario di polis Trudy Hassell ta bira e proximo hefe grandi na KIA. Esaki NoticiaCla.com a haya confirma di su fuentenan, aunke no por a bisa ki dia Hassell ta cuminsa cu su funcion na e posicion. Minister di husticia Arthur Dowers ainda no a haci e participacion oficial, pero ya e noticia a ‘leak’ y NoticiaCla.com a confirma esaki tambe. Hassell tabata un di e 10 personanan local cu a solicita algun luna pasa ora cu e posicion a bira vacante. Dado momento e proceso a keda finalisa y como dos siman pasa, e comision cu a maneha e proceso di solicitud, a entrega nan conseho na minister Dowers. “Ta keda na dje pa tuma e decision final” tabata e reaccion cu NoticiaCla.com a haya.

Mientras cu tin rumor cu un persona liga na partido AVP, Allan Howell su nomber a wordo menciona pa tambe bira un hefe na KIA, esaki no por a wordo confirma pa NoticiaCla.com. Den curso di e proximo dianan, NoticiaCla.com ta spera di por haya mas informacion. Sra Hassell no tabata disponibel pa comentario na momento di lansa e informacion aki.