Aruba a participa den operacion cu a captura 27.5 tonelada di droga

SINT MAARTEN/ORANJESTAD /LYON– Aruba a participa den captura di mas di 27.5 tonelada di droga, conoci como e operacion Lionfish II, un iniciativa di Interpol, envolviendo por lo menos 35 pais di cual Aruba tambe a forma parti di dje. E mision tabata pa combati traficacion ilicito di droga y arma di gruponan di crimen organisa den Caribe y Centro America. E droga confisca ta inclui cocaina, cannabis y heroina. E cocaina so, segun e corant cybernetico di St Maarten ‘Soualiga News Today”, tabata balora na 1.3 biyon di dollar mericano.

Un cordinacion extensivo, provee pa paisnan manera Aruba, Bonaire y Corsou, a pone cu durante 2 siman di trabou, (1-12 di december) por a conduci den aresto di 422 sospechoso. Total di 7.6 tonelada di droga chemical, 100 arma, y 2.2 miyon di dollar cash tambe a wordo confisca. Dos individuo deteni na Republica Dominicano y Peru, tabata e suhetonan di Interpol, como persona busca, den coneccion cu supuesto ofensa incluyendo traficacion di arma y droga, respectivamente.

Operacion Lionfish II tabata parti di e proyecto di Interpol, “Fortaleza” cu ta sostene paisnan den Latino America cu ta combati crimen organisa. Cu un total di 50 laboratorio ilicito produciendo substancia narcotico desactiva, esaki ta un sla formal pa e mundo baho. E operacion a inclui e siguiente paisnan, fuera di Aruba. Anguilla, Antigua and Barbuda, Bahamas, Belgium, Bermuda, Bolivia, Bonaire, British Virgin Islands, Canada, Cayman Islands, Colombia, Costa Rica, Cuba, Curacao, Dominica, Dominican Republic, Ecuador, El Salvador, Francia, Grenada, Guatemala, Honduras, Italia, Jamaica, Hulanda, Nicaragua, Panama, Peru, Sint Maarten, Spain, St Kitts and Nevis, St Lucia, St Vincent and the Grenadines, Trinidad and Tobago, Turks and Caicos, United Kingdom, Merca, Venezuela. Foto ta cortesia di INTERPOL durante parti di operacion na Corsou.