Arubiano ta gana su di tres premio Emmy na Merca

FLORIDA – E arubiano Aaron Hose a ricibi su di 3 premio Emmy siman pasa, cu ta un logro grandi pa un yiu di tera. E ta e productor di e pelicula ‘The Committee’, cu a wordo premia cu un Emmy Award regional, esta e "Suncoast Emmy." Esaki ta e mesun premio cu tur aña ta wordo otorga door di e National Academy of Television Arts & Sciences (NATAS) na e miho produccionnan di television na Merca. No mas cu e Suncoast Chapter di NATAS ta focus riba produccionnan Americano regional procedente di Florida, Alabama, Georgia, Louisiana y Puerto Rico. “ Pues pa via cu e film a wordo traha na Florida over di un topico Floridense, nos a cualifica pa un Suncoast Emmy” Hose ta conta NoticiaCla.com. “ E categoria pa cual nos a gana e Emmy ta "Documentario Historico." Mi a wordo nomina tambe pa e "Editing" di The Committee, pero jammer genoeg nos no a gana esun ey. Asina mes, nos ta sumamente contento cu e Emmy cu si nos a logra haya, vooral door cu esaki ta considera como e premio mas prestigioso den rango di television na Merca” Hose ta sigui bisa.

E pelicula ta trata di un situacion data di 50 aña pasa ora cu un comision chikito, presidi pa senador Charles Johns a purba kita tur homosexual for di e universidadnan di e estado mericano di Florida. Como resultado, un total di 200 studiante y docente gay y lesbiano a wordo expulsa of kita for di trabou. E pelicula ta trata cu dos victima y un interogador, den cual e pelicula ta expone e actividadnan di e comision y con ainda por sinti e efectonan awendia. Wak e trailer di e pelicula aki. 

E pelicula aki no ta nobo, y bo por wak riba e vimeo trailer page tur e avenidanan rond mundo cu e film a screen, y tur e premionan cu e la gana desde aña 2012 (e aña cu e la estrena publicamente). Aña pasa Juni e film a wordo pasa na Cas di Cultura den un programa special cu otro cortometrajenan produci door di cineastanan Arubano. “Pero sin duda 2014 tawata nos aña mas exitoso cu e film, especialmente awo cu e Emmy Award” Hose ta sigui bisa.    

Pa Hose, esaki ta su di tres Emmy. E la gana su prome Emmy na 2008, e di dos na 2009 y awor atrobe. Fuera di esey e la wordo nomina 6 biaha for di 2008.

Segun Hose, e ta stima locual mi ta hasi como video producer y independent filmmaker. “Y mi ta sumamente contento y orguyoso pa mira varios di nos cu ta bin di Aruba (por ehempel Shamira Raphaëla, Rebecca Roos, Juan Torres, Francisco Pardo, Jo Henriquez, Nathalie Biermanns, Ken Wolff, Jonathan Vieira) cu ta hasiendo proyectonan tremendo y resaltando den e industrianan di film y television den mercadonan na Aruba, Europa y Merca.” Hose  a finalisa bisando. Aaron Hose ta un productor di cine, residencia na Orlando, Florida y ta yiu di e conocido legendario di tennis na Aruba Humphrey Hose y Aida Perez Delgado.