AAA: Avioneta cu a baha ilegal na Aruba tabata bayendo Venezuela

Posted on 03/17/2020 9:57 am AST | Updated on 03/17/2020 9:57 am AST

ORANJESTAD – E avioneta cu a baha na aeropuerto Reina Beatrix na Aruba den ora di diamars marduga tabata na caminda pa Caracas, Venezuela. Asina vocero di aeropuerto Hendrik Croes a confirma diamars mainta. No ta conoci pakico a desvia y dicidi pa baha na Aruba envez di Caracas. Manera cu noticiacla.com a raporta caba, e avion aki cu dos piloto Mexicano a bordo, a baha na Aruba den forma ilegal, ora cu aeropuerto tabata cera caba. 

TESTIGONAN OCULAR

Informacion no confirma di testigonan ocular ta bisa cu e avion tabata circula riba Aruba basta rato y bulando basta abou. Ta despues e lo a opta pa baha. Por pensa cu e tabata ‘aclimatisa’ su mes cu e area prome cu e haci su intento di baha ilegalmente na Aruba

SIN PERMISO

Croes a confirma cu e avion no tabatin permiso pa baha. “Aeropuerto a actua segun protocol y autoridad a keda notifica pa tuma over e investigacion” Croes a sigui bisa. E avion a keda realoca pa prepara e aeropuerto pa operacion regular ora dia habri pa awe mainta 7’or.

POLIS

Mientrastanto vocero suplente di polis Liliana Rasmijn a informa oficialmente cu ta toren di control a avisa polis di e avioneta, ora cu e la baha. “ Di biaha ta manda unidadnan di polis y tambe personal di grenspolitie a presenta na e sitio y asina a tuma tur e precaucion nesesario y a bay over na drenta e avioneta y detene dos persona di nacionalidad Mexicano” Rasmijn a bisa. “Nan a wordo transporta despues pa warda di polis.   E caso ta bao investigacion” Rasmijn a finalisa bisando. 

DCA

Pa loke ta DCA, nan a informa cu como cu e caso ta den investigacion, asina cu tin info cu por comparti, lo haci esaki.NOTA: Potret di e avion en cuestion ta cortesia di AAA. 

  • Zulo
  • Powered by SETAR