Ewald Biemans eligi “Green Hotelier of the Year”

ORANJESTAD - Bucuti & Tara Beach Resort y su team a ricibi e grato sorpresa cu Ewald Biemans, doño y Chief Executive Officer (CEO) di e hotel, a ricibi e premio di “Green Hotelier of the Year” di Caribbean Journal. Esaki no ta e prome biaha cu Biemans y/of Bucuti & Tara Beach Resort ta ricibi un premio internacional pa e esfuersonan diario cu nan ta haci pa cu preservacion di naturalesa y medio ambiente en general. Ademas, e low-rise resort aki, situa na Eagle Beach, tambe a ricibi diferente reconocimento den transcurso di añanan pa e nivel halto di servicio y acomodacionnan cu nan ta ofrece.

Semper incluyendo y dunando credito na su team, huespednan y organisacionnan cu a contribui, Ewald Biemans den un entrevista ta splica e secreto di e exito di Bucuti & Tara Beach Resort, cu a logra pa reduci e cantidad di desperdicio cu e hotel ta produci cu no ta destina pa reciclahe cu 60%.

Biemans ta referi na e “award” aki como uno completamente inespera. E ta e reconocimento pa un trayectorio cu a cuminsa den e cuminsamento di añanan 80, ora cu a construi Bucuti y Biemans su amor pa naturalesa y medio ambiente tabatin como resultado cu el a cuminsa implementa diferente procedura y proyecto cu ta beneficioso pa medio ambiente.

E Green Hotelier of the Year ta splica cu e impacto di nan programanan di preservacion di medio ambiente tabata multiple. E clientenan ta completamente na fabor di dje, nan ta encanta cu e programa y ta scoge Bucuti & Tara Beach Resort pa via di su programa y certificacionnan di medio ambiente; nan ta sinti cu nan ta mehora nan “footprint” y nan impacto riba naturalesa un poco pasobra nan ta keda na un hotel cu ta sensitivo pa cu medio ambiente, Biemans ta bisa.

Pa loke ta trata Bucuti & Tara Beach Resort mes, trahando hunto cu EcoTech entre otro nan a logra di cuminsa un programa cu resultadonan excelente, unda cu ta separa componentenan di desperdicio manera papel, carton, aluminium, glas y otro recurso. Cu esaki Bucuti & Tara Beach Resort – aunke hotelnan tradicionalmente ta produci hopi desperdicio – a logra di baha e cantidad di desperdicio cu nan no ta separa di acuerdo cu e posibilidadnan existente na Aruba te na un 40% di e total anual. O sea, mas of menos 60% di tur desperdicio produci na Bucuti & Tara Beach Resort ta bay ya separa caba pa Reciclahe; esaki ta ademas cu e hotel tambe ta aplica principionan di Reduci y Re uza. Pues, e decisionnan pa separa desperdicio y manda tur loke por pa reciclahe tambe a beneficia Parkietenbos, Ewald Biemans a laga sa.

Ademas di e Green Hotelier of the Caribbean Award 2014, e hotel y/of Biemans mes a ricibi diferente reconocemento di Green Globe, e hotel a wordo nombra hotel mas romantico den Caribe na 2014 y den mundo na 2013; Conde Nast Traveler a honra e hotel na diferente ocasion como un di e top hotelnan di Caribe, etc.