‘Happy Information Officers' lo yuda guia nos bishitantenan na Aruba

ORANJESTAD - E proyecto piloto di Happy Information Officers den Caya Grandi a keda lansa dialuna ultimo. Ta trata aki di un total di 7 Information Officers cu lo ta ubica na waf, den Caya Grandi y den area di High Rise pa duna informacion y sugerencianan na nos bishitantenan. E oficialnan ta studiantenan di Universidad di Aruba cu a haya un training extensivo riba diferente area pa por ta e cara di nos isla dilanti e bishitantenan. Nan lo ta movilizando den e areanan ariba menciona cu un tablet cu wi-fi y nan ta disponibel pa cualkier turista cu acerca nan cu cualkier pregunta of duda. Intencion di e programa aki ta pa duna mas tanto informacion cu ta posibel na nos bishitantenan, kico tur tin di haci, con ta mas lihe pa nan por mobiliza riba nos isla, kico ta e eventonan cu tin cu Gobierno ta promove y tambe kico tur nan por haya, ademas de diferente atraccion pa por facilita nan estadia na Aruba.