Rutte: Gran parti di Hulanda lo keda contagia cu COVID-19

DEN HAAG – Gran parti di Hulanda lo keda contagia cu e coronavirus, y por lo pronto e virus lo keda presente. Asina premier Hulandes Mark Rutte a bisa den un discurso nacional riba e tema. El a cuminsa su discurso refiriendo na medidanan sin precedente den un tempo di paz. A priminti comercio di lo haci lo posibel pa sostene nan. A pidi tur 17 miyon habitante pa cuida otro. Mientras cu el a bisa cu e virus lo keda circula, un gran parti di e poblacion lo keda contagia. Un punto sigur cu a hala atencion ta su mensahe pa famia di esnan cu ya a perde e bataya contra e virus, y esnan cu a contagia y cu ta recuperando. A priminti esnan vulnerable pa haci tur cos pa minimalisa e risico pa nan. E palabra sabio ta di e expertonan riba e tereno aki riba cual a confia y a tende te cu awor y cu ta algo cu tin cu sigui tambe. 

Rutte a plantea tres diferente scenario pa e pais, di cual e prome ta cu lo tin un control total, pa asina purba limita e cantidad di contagio. Esey por nifica cu un grupo grandi di persona por keda contagia den un forma controla, creando asina un muraya di imunidad. E grupo aki, ta bira su tarea pa e muraya aki protega esnan cu ta keda vulnerable. Un otro scenario lo tabata pa cera e pais na candal, den un estilo di lockdown, pero esey no ta un garantia cu e lo yuda. E virus lo bin bek y haci porta daño toch y e duracion di e lockdown lo por dura largo. Posiblemente un aña prome cu e keda resolve. 

Consecuencia economico ta grandi y hopi comerciante ta preocupa pa nan negoshi, y e trahado preocupa cu su trabou. “Nos lo no laga boso na caya” Rutte a sigura tur hende. 

Y finalmente, Rutte a pidi sosten di e pueblo Hulandes. Hunto lo vence e caso aki. “Mi ta conta cu boso. Cuida otro un poco” Rutte a finalisa su discurso. Lesa e discurso na Hulandes completo AKI.