Programa di carnaval 2015 di SMAC a keda lansa

ORANJESTAD – Despues di hopi anticipacion, diamars mainta e fundacion nobo di carnaval, SMAC (Stichting Maneho di Aruba su Carnaval) a lansa e programa asina anticipa di carnaval 2015 di Aruba. Un total di 29 actividad cu tin planea pa e periodo cortico di carnaval, cu ta cuminsa for di 4 di januari 2015(Soca Walk-a-thon) y ta bay te 16 di februari 2015 cu kimamento di momo. Un di e cambionan ta tambe algun actividad nobo, y cu e parada di noord no ta cay riba e mesun dia cu esun di lighting parade (ex tivoli lighting parade). 

Contrario na añanan anterior, e programa di carnaval tabata wordo lansa riba 11-11 di e aña prome, pero e aña aki, cu tur e ‘problemanan’ cu tabatin, esaki no tabata e caso. Ora cu SMAC finalmente a haya sa cu nan ta organisa carnaval, tabatin un caso pendiente di corte, cu finalmente tambe a wordo kita for di caminda ora cu gobierno a gana e caso. Pero e ora ainda, SMAC no por a ‘release’ e programa debi cu e programa no tabata aproba ainda. Pero awor si, e programa extenso, unda cu tin varios cos nobo, a keda lansa. (Por lesa e programa di carnaval aki).