GNC y polis a diasabra mainta a captura dos damanan Venezolano

ORANJESTAD – Guarda nos Costa y polisl diasabra mainta a captura e dos muhernan Venezolano cu lo a burla di autoridad relaciona cu e caso di e patruya 37. Minister di Husticia mr. Andin Bikker ta sumamente contento di por a haya e bon noticia awe diasabra mainta for di Directora di Guarda nos Costa cu a detene nan cu pa varios dia tabata ser busca pa nan deportacion despues cu nan peticion pa asilo a keda nenga.   

TRUDY HASSELL

Siguientemente e participacion di Sra. Trudy Hassell directora di Guarda nos Costa cu a anuncia na pueblo di Aruba cu diasabra mainta a detene e dos personanan cu durante un par di siman caba tabata haci mofa y burla di Aruba en general. E burla tambe tabata dirigi na tur Arubiano y tur otro stranhero cu ta bibando legalmente y ta cumpli cu leynan vigente. Sra. Hassell a bisa di ta sumamente orguyoso di tur trahado di Guarda nos Costa y cu ayudo di Cuerpo Policial pa nan trabou pasobra pa varios dia tabata busca e dos damanan aki. 

DEPORTACION

Awe mainta Sra. Hassell a confirma tur dos a keda deteni pa Guarda nos Costa y ta bay pone nan den e proceso di deportacion. Hunto cu e proceso di deportacion ta spera cu despues di peticion cu ta bay haci na Ministro di Husticia cu na momento nan wordo saca di Aruba obligatoriamente, ta bay pone riba e 'no wanted list' pa asina garantisa cu nunca mas nan ta bolbe bek pa e pais aki cu tanto a burla di dje. Un pais cu a duna e personanan aki e sosten na momento cu  a bin Aruba. Manera ta conoci su peticion pa asilo a wordo nenga y esey ta un proceso legal cu a tuma luga corectamente y na momento cu el a wordo nenga e tabata sa cu e ta ilegal.