Tin 13 trahador di WEB den cuarentena pa coronavirus

ORANJESTAD – Un total di 13 trahado di WEB Aruba NV ta na cas bou di cuarentena pa 14 dia largo, relaciona cu coronavirus. Esaki Sharline Koolman di Departamento di Salud (DVG) a informa diasabra mainta durante un conferencia di prensa hunto cu WEB. Koolman a clarifica si mesora cu e personanan aki no tin ningun simptoma (ainda) y cu como precaucion a manda nan cas. E persona cu nan a bin den contacto cune, e Mericano di 65 aña di edad, ta esun cu a test positivo pa coronavirus e siman aki y ta den hospital isola. 

E CASO

Segun Richard Frank, gerente di production di e planta, e persona en cuestion ta un consultant y a bin Aruba dialuna for di Merca pa duna servicio na e sector di customer service, y tambe parti electronico y mecanico na e planta. Sinembargo, segun DVG, e persona aki tabatin e simptomanan pa basta dia caba, for di prome cu el a yega Aruba. De hecho, segun Koolman, e persona aki tabata den su fase final caba di e contagion. Ta papia cu e prome 2 pa 7 dianan ta crucial pa e contagion tuma lugar. Aparentemente for di dia 28 di februari e persona ta sintie simptomanan, y tabatin 10 dia cu esaki malo caba. Asina mes el a bin Aruba pero ta na Aruba numba el a test pa e malesa. A mustra cu un persona contagia, por plame entre 2 pa 3 persona mas, pero no ta conoci si a logra plama e malesa entre e 13 personanan di WEB. Tempo lo tin cu determina esaki. Tambe segun Koolman, pa loke ta e 13 trahadonan di WEB, nan no tin e simptoma, pues dificilmente nan por a ‘plama’ esaki rond. “Bo mester tin e simptoma pa por haci esaki” Koolman a sigui sigura prensa diasabra mainta. 

WEB 

Pa loke ta WEB, Frank a sigura cu e persona en cuestion no tabatin aceso na e planta, y de hecho tabatin un oficina temporal den un di e modulonan riba tereno, y no den e oficina principal di WEB. Pues no ta teme pa contagio di personanan den e planta. Mes momento Frank a desmenti categoricamente cu e awa lo ta contamina door di esaki. Segun Frank, e ta garantisa 100% cu e awa ta safe, no tin ningun virus den dje, y tampoco esun COVID-19, y ta djis malinformacion ta circula riba e tema aki.