Maduro: No mester tin panico pa producto pasobra tin suficiente mercancia na Aruba

ORANJESTAD – Tin suficiente alimento y combustible na Aruba y comunidad no mester drenta panico y cumpra ‘bay gol’, pasobra tin crisis pa coronavirus. Esey tabata e mensahe di minister di Economia Xiomara Maduro diabierna atardi laat durante un conferencia di prensa. Segun e mandatario, flankea pa director di un compania grandi di mayorista, Hubert Dirksz, tin suficiente container cu mercancia y combustible pa abaste nos isla pa largo. Pa e productonan di canasta basico, lo tin un control rigido pa eventual abuso di prijs di parti di comercio. 

PANICO

A compronde e panico di comunidad pa abastece nan hogar cu suficiente mercancia diabierna, ora cu supermercado y boticanan a haya un avalancha di hende, cu a pone cu mester a limita cierto productonan manera paracetamol y vitamina pa cierto clientenan, cu ta derecho di e negoshi pa haci segun Dirsksz a splica e portal aki. Pero a splica tambe cu no tin necesidad pa ‘hamster’ pasobra tin suficiente producto, hasta si dicidi despues cu ningun mercancia extra por drenta pa cualkier motibo.