DVG: Trahadonan cu tabatin contacto cu Mericano infecta, mester bay cas pa isolacion

ORANJESTAD – E prome persona contagia cu e virus COVID-19 ta un mericano cu tabata na Aruba algun dia caba. El a bin traha como consultant pa e compania estatal WEB Aruba NV. Segun e hefe di dept di malesa contagioso Sharline Koolman, a bay na e compania estatal unda cu e persona tabata traha, y for di mainta tempran na WEB tabata ocupa cu esaki. 

LISTA DI CONTACTO

Mester a laga cada hefe di departamento di WEB traha un lista pa DVG di kende tabata e contacto directo di e persona aki. A base di esey, e persona aki (esun cu a drenta contacto cu e Mericano) lo bay cas pa isolacion. No cu nan tin symptoma, pasobra DVG no kier warda te ora nan haya simptoma pero lo manda nan cas y evalua e caso tur dia. Esnan cu no tabatin contacto directo cu e Mericano, nan lo por sigui traha. Pero DVG lo ta na WEB tur mainta pa evalua e situacion hunto cu e compania aki. A compronde cu esnan cu ta traha na bali, cu publico, no tabatin contacto cu e persona aki pues segun DVG no tin riesgo pa nan. A pidi e trahadonan di WEB pa no bay den panico. A pidi tur persona cu lo por a haya contacto cu e Mericano, pa tuma contacto cu nan manager cu na su turno lo sigui e pasonan siguiente. 

E OTRO VICTIMA

E di dos persona ta uno local cu ta un tiki mas facil pasobra segun DVG, bo por isole na su cas. A establece contacto cu e famia for di diahuebs, y esey lo sigui den e dianan cu ta sigui.