Polisnan preparando pa implementacion ley di cacho

SAN NICOLAS – Un grupo di 20 polis a tuma parti na e siman di entrenamento, na caminda pa implementacion di e ‘Ley di Cacho’ entrante 1 di januari 2015 na Aruba. Durante un total di 4 dia largo, polisnan hunto cu voluntario lo haya instruccion riba e.o. e ley nobo di cacho, kico su embergadura ta, y con pa aplica esaki miho posibel. Fuera di esey, den curso di siman, e polisnan y demas cursante, lo haya informacion balioso y entrenamento con pa ‘deal’ cu cacho, tur e informacion importante pa por atende cu un cacho, y kico tur un persona mester sa ora cu e ta trata cu cacho. For di veterinarionan te na entrenadornan di cacho, lo comparti e experticio na e grupo aki, pa asina aña bolter, tur esnan envolvi, por haci nan trabou di un miho manera.

E preparacion pa cu e siman aki, tabata e.o. na encargo di Plataforma Ley di Cacho, cu ta consisti di un grupo importante cu tin di haber cu cacho. For di e aspecto legal, medico, te na esun di entrenamento di cacho, pa percura pa tur angulo ta cubri. Lidera pa comisario di polis Trudy Hassell, e Plataforma a traha duro pa e ultimo lunanan pa keda cla na tempo pa por implementa e ley ora cu aña bolter. Riba e combinacion di potret por mira e prome grupo di polis hayando instruccion riba e ley di cacho. E lesnan lo continua pa e resto di siman na e instituto di polis na San Nicolas.