HOH: Na Hospital di Aruba ainda no tin ningun pashent cu coronavirus

ORANJESTAD – Hospital a informa cu te awe, esta diabierna,13 di maart, no a constata ningun caso di coronavirus na Hospital. Si a hasi test cu pashent cu a yega Hospital cu sintoma corespondiente, pero tur test te cu awe a sali negativo.

PROTOCOL HOH

Hospital su team di expertonan a sigui traha duro riba mehora e protocolnan a base di e desaroyo nan mundial rond di e coronavirus, a sigui duna informacion y training na tur miembro di personal pa asina atende cu esaki si encaso un pashent yega HOH cu coronavirus.

BISHITANTENAN

Cu e salud di nos pashentnan na prome luga Hospital desde awe ta bay ta mas estricto pa cu e regla ya existente di mantene un maximo di 2 bishitante na mes momento pa pashentnan interna. Porfabor mantene un bon higiena di man hasiendo uzo di nos hand sanitizers situa na diferente lugarnan strategico. Alabes si bo bishita un pashent interna purba mantene un distancia di mas o menos 1 meter cual tambe ta yuda minimalisa e riesgo di contagio. Ta pidi cooperacion mirando cu nos kier minimalisa e riesgonan pa nos pashentnan cu ta malo y interna.

SINTOMANAN

Si encaso bo tin un di e sintomanan di coronavirus, esta keintura riba 38 grado, tos seco y falta di rosea por fabor tuma contacto cu e callcenter institui pa Gobierno di Aruba na telefon 2800101. Pa asina combati contagio no acudi Huisartsenpost (dokter na warda) y solamente acudi Departamento di Emergencia si encaso bo tin sintomanan severo. 

"Por fabor tene bon na cuenta e gruponan di riesgo esta persona nan 80 aña of mas y tambe hende cu ta sufri di un of mas malesa y pues tin un sistema imuno abou.

Nos ta sigui pidi tur hende pa mantene un bon higiena di man, keda calmo y sigui di cerca e pagina di facebook di Hospital cu lo mantene boso bon informa tocante lo ultimo den cuadro di coronavirus" e comunicado ta sigui bisa.