Sevinger: Nos lo kibra tur e contractnan di plantamento di marihuana’

ORANJESTAD – Dia cu partido AVP drenta gobierno bek, nan lo kita e licensia(nan) di esnan cu ta cultiva cannabis pa finnan medicinal. “Tin un cos cu nos lo kita ta esaki. Sigur sigur plantamento di marihuana bou di nos gobernacion ta wordo afgeschaft” Benny Sevinger, actual parlamentario pa partido AVP a bisa den un conferencia di prensa, no refiriendo na e palabra cannabis, sino marihuana. “Nos ta kita e tipo aki, (e) ta un porkeria grandi, un peliger pa nos comunidad, pa nos yiunan, nos generacionan futuro y pa nos pais en general”, e parlamentario a sigui bisa. “Nos lo kibra tur e contractnan aki di plantamento di marihuana”. E parlamentario ta referi na e proyecto di gabinete Wever Croes cu recientemente a anuncia cu lo pasa e ley pa cultiva y exporta cannabees e aña aki, cu lo tin cu genera 15 miyon florin na licensia.