Partido di coalicion tin problema cu parti di prespuesto 2020

ORANJESTAD – Enbes di warda tratamento di presupuesto cuminsa dentro di poco, dos parlamentario a vocifera nan preocupacion caba publicamente pa cu esaki. Cu oposicion tambe tin problema cu e presupuesto ta normal, pero loke ta haci esun di e dos parlamentarionan di POR ‘relevante’ ta e hecho cu ta trata di parlamentarionan di partido den propio coalicion di gobierno, lider di fraccion di POR, Dellanire Maduro y Alan Howell cu no ta contento cu algun punto di e presupuesto. Esaki no kier men cu tin ‘crisis’ den coalicion, sino cu nan no ta confortable pa pasa e ley, as is, y kier cambio. Durante tratamento di presupuesto, lo haya sa con determina e partido POR ta pa deal cu esaki.

PREGUNTA

Manera ta conoci, parlamentarionan a haya te diabierna awor (13 di maart) pa entrega pregunta riba e presupuesto. E ora ta duna gobierno tempo pa por procesa e preguntanan y contesta bek. Ta na e momento ey, por schedule e reunion publico pa cuminsa e tratamento di e presupuesto, durante cual lo trata e contestanan cu ainda mester bin y cu por wordo contesta publicamente. No ta conoci si fuera di vocifera e preocupacionnan aki asina den prensa, cu POR a manda e preguntanan aki tambe ‘formalmente’ pa gobierno pa haya un contesta. Loke si a bisa, ta cu si no cambia e prespuesto, POR lo entrega amiendanan necesario pa e cambionan wordo vota ariba. Pregunta ta cu si no haya e votonan suficiente, si POR lo vota contra. 

KEHONAN

Pa loke ta e kehonan brevemente splica, Howell tin problema cu gobierno kier aumenta e asina yama deviezenprovisie, cu ta haci cu esaki ta pone cosnan bira mas caro na Aruba. Maduro, tin problema cu entre otro gobierno kier mishi cu e fondonan di ATA, y duna ministernan poder pa haci escogencia riba esaki. Ademas Maduro no ta di acuerdo cu kier deshaci di e cambio riba e areglo special cu hotelnan p.e. tin via e asina yama IPC regeling, esta e Imputation Payment Company. Esaki ta un forma pa stimula inversion unda companianan den cierto sectornan ta haya beneficionan fiscal. Maduro kier pa gobierno deshaci di e pensamento cu nan tin. Ambos a ‘informa’ caba cu nan lo bin cu amienda pa ‘coregi’ e parti aki, si gobierno no haci e cambio nan mes. 

LEJUEZTin tambe e asunto di e parlamentario independiente Daphne Lejuez cu a mustra su malcontento caba pa e.o. e time frame den cual e presupuesto ta wordo trata. Aki tambe por spera resistencia, aunke den e caso aki, ta trata un parlamentario independiente. Si fraccion di AVP, Lejuez y POR vota contra, e ora si gobierno tin un problema pa cu e presupuesto. Si Lejuez tambe vota contra, esey ta nifica cu no tin mayoria y cu e prespuesto por keda sin pasa, cu tur su consecuencia cu esaki por tin.