Medida contra COVID-19 awor ta valido pa henter Hulanda

DEN HAAG – Hulanda diahuebs a amplia medidanan pa cu coronavirus COVID 19 di un provincia y a hacie valido pa henter Hulanda. Ta trata di e provincial Noort-Brabant, unda cu manera cu noticiacla.com a raporta diaranson caba, ta esun mas afecta na Hulanda cu riba 200 caso confirma. Minister di salud Bruno Bruins a haci e anuncio aki durante un conferencia di prensa riba e tema menciona. Scolnan sinembargo no ta necesario pa wordo cera segun premier Mark Rutte. 

MEDIDA ADICIONAL

Pa loke ta e medidanan adicional, esaki ta nifica cu hendenan cu keho di verkoud of otro keho suave di griep, mester keda cas, y tambe evita sali pafo te ora cu nan ta recupera. Evenementonan cu mas di 100 hende hunto, ta wordo cancela den henter Hulanda. E medidanan aki ta valido te 1 di april. 

CERA SCOL?

A mustra cu no ta necesario pa cera scol, mirando e nivel di e problema na Hulanda. Esaki pasobra tin poco contaminacion via scolnan. Y si bo cera scol, hopi mayornan lo tin cu keda cas pa wak pa nan yiunan, cu ta crea un otro problema social. Y e hendenan aki ta traha p.e. den cuido medico unda cu nan ta hopi necesario segun Rutte. E keho di prensa, di pakico ta bisa mayornan pa keda cas, pero si manda muchanan scol, ta splicabel segun Rutte. E muchanan cu ta malo, tin cu keda cas. Esey ta haci cu e resto di scol ta keda safe pa otro muchanan pa cual no tin cu cera scol. Y ademas otro paisnan cu si a cera scol, ta pasobra e nivel di coronavirus eynan ta mas serio, pasobra no tin tempo mas pa sinta busca cada bez unda e fuente di e brote ta. Y tin mas contagio cu ta drentando den henter Hulanda unda cu no ta cla unda e fuente ta.