Brabant na Hulanda ta sinti efecto grandi di coronavirus

‘S HERTOGENBOSCH – E provincia di Brabant y Utrecht na Hulanda ta esnan mas afecta pa e coronavirus COVID 19. Den e provincial di Brabant so tin mitar di e total di e casonan (503) cu ta 223. Loke ta haci e informacion aki relevante ta cu tin basta studiante di Aruba na Brabant, mas of menos 150 segun Arubahuis a informa Noticiacla.com, mientras cu na Utrecht tin entre 125 pa 150 studiante di Aruba. For di studiantenan mes di Aruba cu ta na Tilburg p.e., e portal ta hayando informacion cu e ciudad aki ta totalmente den gara di e virus aki. Dos scol frecuenta pa studianten di Aruba ta entre otro Fontys Hogeschool y Avans. 

BIDA NA BRABANT

For di e informacion cu e portal aki a ricibi, varios negoshi na Tilburg tin informacion poni, den forma di poster cu informacion, pamfleta cu instruccion y tambe reglanan con pa procede pa cumpra cos y te hasta cuanto cos por cumpra. Tin tienda cu no ta permiti bo paga cu placa cash, sino ta acepta solamente pa swipe. Tambe tin limitacion di mercancia pa cada cliente, dependiendo e producto. Por pensa e.o. riba hand sanitizer, paracetamol y otro articulo nan cu ta usa pa preveni pf combati malesa. Loke a hala atencion ta cu den mayoria tienda, esnan cu ta traha, ta bisti handschoen awor. 

E GRIEP

Pa loke ta simptoma di e virus, a pidi tur hende pa si bo ta sinti malo dus niester, tosa, dolor di garganta y/of cabes etc. bo mester keda cas. Esey ta conta pa full Brabant. Si bo tin problema pa hala rosea y/of keintura bo tin cu consulta un dokter. Y asina tin yen di regla na e ciudad aki cu ta parce di ta un di e centronan mas afecta na Hulanda pa e malesa aki. 

POSITIVO

Mientras cu ta comprendibel cu tin mayornan na Aruba hopi preocupa pa nan yiunan cu ta studiando eynan of otro caminda na Hulanda, e bon noticia ta cu mayoria hende cu haya e virus, ta cura di dje. Esey lamentablemente no ta wordo propaga hopi suficiente, pero e realidad ta cu mayoria ta recupera completamente y ta haye solamente como un griep. Ta un grupo otro (hende di edad cu tin malesa cronico caba), tin risico di por fayece si nan no maneha e virus di un manera responsabel. 

CASO NA GRONINGEN

Tambe ta raportando dos caso (no confirma) di e virus, cu ta un studiante y un persona adulto. No ta conoci ainda cua scol e studiante ta bayendo, cu ta haci claro cu esaki tin hopi mayor na Aruba preocupa cu un situacion asina. Mes momento mester sigura atrobe tambe, cu esnan cu keda contagia, mayoria ta recupera normalmente, pues no mester alarma ora si en caso un persona asina (cu no ta den e grupo di riesgo esta di edad avansa y cu malesa cronico anterior) keda contagia.