Gobierno cu fondo pa negoshi y trahadonan pa wanta ‘sla’ debi na coronavirus

ORANJESTAD – Gobierno di Aruba lo prepara un pakete di estimulo pa negoshinan na Aruba relaciona cu e efecto di coronavirus COVID 19, pa asina mitigua cualkier efecto negativo. Prome minister Evelyn Wever a informa di esaki diaranson merdia. A mustra cu ta trahando tres diferente plan di contingencia. E prome ta trata cuido medico, mientras cu e di dos plan ta pa cuida nos turismo. E ultimo plan ta uno titula economic and innovation stimulus package cu ta pa negoshinan mediano y chikito, y trahadonan cu debi na e coronavirus, por haya nan mes den problema financiero. E prome fase lo ta e forma lihe pa atende cu peticion di inversionan cu a keda entrega caba, eliminando e red tape. Tambe lo tin un ‘economic and innovation fund’ cu lo wordo introduci pa yuda negoshinan den forma financiero. Cuanto lo inverti den e fondo, ta depende di algun factor. Imporante ta pa e presupuesto na parlamento wordo aproba. Ademas gobierno a informa cu ta pidiendo fondonan di instancianan internacional cu a pone esaki disponibel. Cu e fondo aki, y e plan di emergencia, Aruba ta bira un di e prome paisnan den region cu ta prepara pa esaki. Esaki segun prome minister Evelyn Wever.