Oduber: Tur pashent cu supuesto simptoma di Coronavirus na Aruba a test negativo

ORANJESTAD – Tur pashent cu a yega hospital cu simptoma corespondiente di coronavirus, a sali negativo. Asina minister di salud Dangui Oduber a bisa dialuna atardi, riba su pagina di Facebook. Cu esaki e ta desmenti cu tin pashentnan na Aruba cu a test positivo pa Coronavirus. Tabatin rumor cu tabatin turista na hotelnan cu a yega cu e virus, pero esaki a keda desmenti. Mas probable cu nan lo tabatin simptoma, pero ora cu a haci test, esaki a sali negativo. 

TEAM

Segun Oduber, hospital tin un team di expertonan cu ta consisti di un arts-microbioloog, un internist-infectioloog y tres experto riba tereno di infectiepreventie cu 24/7 ta sigui di cerca tur desaroyo mundial rond di e coronavirus pa asina atende cu esaki si en caso e mester bati na nos porta.

SIMPTOMA

E sintomanan di coronavirus ta hopi similar cu e otro enfermedadnan respiratorio cu ta contagioso. Esakinan ta falta di rosea, keintura y tosamento. Ta importante pa si encaso un persona ta experienciando e sintomanan aki por tin e posibilidad di ta contagia cu e virus. Si esaki ta e caso mester tuma contacto via telefon cu bo dokter di cas. A pidi tur hende pa mantene un bon higiena di man, keda calmo y sigui di cerca e pagina di facebook di Hospital cu lo mantene boso bon informa tocante lo ultimo den cuadro di coronavirus.